Ǵylym – memlekettiń mereıin asyryp, qoǵamdy jarqyn hám jańashyl arnaǵa jeteleıtin birden-bir kúsh ekeni anyq. Onyń qanat jaıyp qarqyndaýy tutas eldiń bolashaǵyna tikeleı áser etetini belgili. Osy rette jyl saıyn Qazaq ulttyq qyzdar pedagogıkalyq ýnıversıtetinde «Ǵylym aptalyǵy» uıymdastyrylady. Atalǵan shara bıyl da jalǵasyn tapty.
Uıymdastyrýshylar aptalyqtyń eki túrli mańyzdylyǵyn alǵa tartady. Birinshiden, ýnıversıtettiń ǵylymı-zertteý qyzmetiniń jyldyq qorytyndysyn shyǵarý. Ekinshiden, ǵylymǵa jas ǵalymdar men stýdentterdi, magıstranttardy, doktoranttardy tartý, olardyń ǵylymı áleýetin kóterý maqsatynda túrli dóńgelek ústelder, belgili ǵalymdarmen dárister, vebınarlar ótkizý.
«Dástúrli túrde ótetin is-shara bıyl da uıymdastyrylyp jatyr. Aptalyq aıasynda «Jastar jáne ǵylym: búgini men bolashaǵy» taqyrybynda respýblıkalyq stýdentter, magıstranttar, doktoranttar men jas ǵalymdardyń ǵylymı-tájirıbelik konferensııasy ótedi. Konferensııada jas ǵalymdar «Strength of language», «Capacity of social science», «Information learning and STEM», «Efficiency of teaching», «Natural science», «Culture and ART» jáne «E-S Talks» baǵyttary boıynsha ǵylymı jańalyqtary men izdenisterin kópshilik nazaryna usynbaq. Sonymen qatar alqaly jıyn sheńberinde el Táýelsizdiginiń 30 jyldyǵyna arnalǵan I Halyqaralyq onlaın basqosý uıymdastyrylmaq», deıdi uıymdastyrýshylar.
Qazaq ulttyq qyzdar pedagogıkalyq ýnıversıteti Fılologııa ınstıtýtynyń dırektory, professor, fılologııa ǵylymdarynyń doktory Tynyshtyq Nurdáýletqyzy aptalyqtyń mańyzdylyǵyna toqtala kele, ýnıversıtettiń ǵylymı áleýeti jyl saıyn artyp, halyqaralyq baılanystar bekı túskenin jetkizdi.
«Qazirgi tańda ýnıversıtetimizde halyqaralyq basylymdardaǵy ǵylymı jarııalanymdar men halyqaralyq ǵylymı baılanystardyń kóbeıýinen halyqaralyq aqparattyq resýrstar jáne t.b. qoljetimdiliktiń edáýir artqany baıqalady. Onyń dáleli, ýnıversıtet qurylǵanda alǵashqy ashylǵan fakýltetterdiń biregeıi, qazirgi Fılologııa ınstıtýty kadrlyq áleýeti jaǵynan da, jyldyq monıtorıng nátıjesi boıynsha da kósh basynda. Akademııalyq utqyrlyq baǵdarlamasy boıynsha ınstıtýtqa sheteldik bilim alýshylardyń qyzyǵýshylyǵy báseńdegen emes, kerisinshe jyl saıyn osy baǵdarlama aıasynda sheteldik bilimgerler dáris alady. Aldaǵy ýaqytta kafedralardyń zor ǵylymı áleýetin halyqaralyq arenada tanytýǵa baılanysty birqatar jobany júzege asyrmaqpyz», dedi T.Nurdáýletqyzy.