Nur-Sultanda káriz qaqpaqtaryn urlaǵan taksı júrgizýshisi ustaldy, dep habarlaıdy Egemen.kz.
Polısııa departamentiniń málimetinshe, taıaýda ǵana jeke kásiporyn S-316 kóshesinde káriz qaqpaqtaryn ornatýǵa baǵyttalǵan jol jumystaryn júrgizgen. Al jolaýshylar tasymaldaýmen aınalysatyn kúdikti túngi ýaqytta atalǵan kóshemen ótip bara jatyp, 7 jańa qaqpaqty urlap ketken. Kúdikti júrgizip júrgen kóligin jalǵa alǵandyǵy belgili bolǵan.
«Er adam urlanǵan káriz qaqpaqtaryn bólshektep, metall qabyldaý pýnktine 9 myń teńgege satyp jibergen. Qaqpaqtardy satyp alýshyny qylmystyq jaýapkershilikke tartý jáne ony urlanǵan metalldy satyp alýshy retinde esepke alý máselesi sheshilip jatyr. Sonymen qatar onyń qyzmetiniń de zańdylyǵy tekserilýde. Qazirgi ýaqytta QR QK 188-babymen tergeý amaldary júrgizilýde», dep atap ótti Polısııa departamenti.
Vedomstvo málimetinshe, sáýirdiń 27-29 aralyǵynda elorda aýmaǵynda «Quqyqtyq tártip» aldyn alý is-sharasy ótkizilip jatyr. Is-shara qoǵamdyq tártipti qamtamasyz etý, kósheler men qoǵamdyq oryndarda qylmystyń aldyn alý jáne jolyn kesý maqsatynda uıymdastyrylǵan.
Nur-Sultan qalalyq PD Krımınaldyq polısııa basqarmasynyń bastyǵy Dmıtrıı Demıdovtyń aıtýynsha, is-shara ótkizilgen eki kúnniń ishinde qala aýmaǵynda 67 metall qabyldaý pýnkti tekserilgen.