Syr óńirinde el Táýelsizdiginiń 30 jyldyǵyna oraı oblystyq etnomádenı birlestik músheleriniń qatysýymen túrli is-shara júıeli túrde ótkizilip keledi. Bıyl kóktemde «Qaıyrymdy ister marafony» jalpyulttyq jobasy bastaý alyp, izgilikti bastama kóp qoldaýyna ıe boldy.
«Qoǵamdyq kelisim» KMM-niń jumys josparyna sáıkes oblystyq QHA janyndaǵy ǵylymı-sarapshylyq toby «Táýelsizdik jyldaryndaǵy jetistikter» taqyrybynda dóńgelek ústel, 1 naýryz – Alǵys aıtý kúnine oraı «Qazaqstan Táýelsizdigine 30 jyl: birlik pen biregeıliktiń modeli» atty respýblıkalyq ǵylymı-tájirıbelik konferensııa ótkizildi. Barlyq bilim berý mekemelerinde osy taqyrypta tárbıe saǵattary uıymdastyryldy.
«30 ıgi is» qaıyrymdylyq aksııasy aıasynda «Júrek jylýymen» atty áleýmettik kómek kórsetý sharalary uıymdastyryldy. Jyl basynan beri 60-tan astam qaıyrymdylyq sharasy ótkizilip, 2752 adamdy qamtyǵan kómekke demeýshiler qoldaýymen 12 708 160 teńge qarjy jumsaldy.
Osy jylǵy jańalyqtyń biri – «Qoǵamdyq kelisim» KMM bastamasymen «30 jylǵa – 30 tulǵa» is-sharasy bastaý aldy. Joba aıasynda táýelsizdik jyldarynda Syr óńiriniń ósip-órkendeýine jáne jalpyulttyq birlik pen kelisimdi saqtaýǵa súbeli úles qosqan etnos ókilderi nasıhattalady.
Solardyń biri – tatar etnomádenı birlestiginiń ardageri Raısa Smahanova. Qazaq otbasyna kelin bolyp túsken Raısa Hanıvqyzy nemere, shóbere súıgen áje. Birneshe jyl oblystyq Qazaqstan halqy Assambleıasy janyndaǵy Analar keńesiniń tóraıymy qyzmetin atqaryp, el arasynda birlik pen tatýlyqtyń bekı túsýine eseli úles qosty.
Bıyl Qyzylorda qalasyndaǵy Dostyq úıinde qazaq tilin oqytý kýrsy bastaldy. Aptasyna eki márte tegin ótetin kýrsqa jazylýǵa tilek bildirgender kóp. Dostyq úıindegi tilderdi oqytý kabınetiniń jetekshisi Gúlzıra Sársenbek júrgizetin kýrsqa úlkender de qatysyp júr.
San etnosqa saıa bolǵan Syr elindegi bul bastamalar tatý eldiń tabysy kóp bolatyndyǵyn dáleldep turǵandaı.
QYZYLORDA