QMDB tóraǵasy, Bas múftı Naýryzbaı qajy Taǵanuly qazaqstandyqtardy 1 mamyr kúnimen quttyqtady, dep habarlaıdy Egemen.kz
Qadirli otandastar!
Barshańyzdy Qazaqstan halyqtarynyń birligi merekesimen shyn júrekten quttyqtaımyn! Ár shańyraqqa shattyq, mol baqyt, myqty densaýlyq, birlik pen tatýlyq tileımin.
Birinshiden, búgingi syndarly sátte eń áýeli ár otbasynda ózara súıispenshilik pen syılastyq, birlik pen qurmet syndy qundylyqtardy arttyrýdyń mańyzy erekshe. Bul máselege asqan jaýapkershilikpen qaraǵan abzal. Otannyń ózi otbasydan quralady emes pe? Halqymyz: «Otan – otbasydan bastalady», – deıdi.
Ekinshiden, ujymdaǵy birlikti nyǵaıtýǵa mán berilse. Bul rette túrli sala basshylaryna kóp mindet júkteledi. Ýaqytynyń kóp bóligin jumysta ótkizetin azamattar arasynda ózara syılastyq syndy adamgershilik qundylyqtar qalyptassa, bul jaǵdaı otbasy men qoǵamdaǵy birlikke oń áser etedi.
Úshinshiden, aǵaıyn arasyndaǵy tatýlyqqa mán bersek. Qýanysh pen qaıǵyda birge bolý – týystyq qarym-qatynasty arttyratyn adamgershilik qasıet.
Tórtinshiden, qoǵamdyq birlik – asa mańyzdy máseleniń biri. Buǵan ár azamat úles qosýy tıis dep esepteımin. О́ıtkeni, elimizdiń ıgiligi men birligine úles qosý – óz bolashaǵymyzǵa úles qosý.
Qurmetti jamaǵat!
Alla Taǵala qasıetti Quranda bizderge: «Allanyń jibinen myqtap ustańdar, ajyrap bólinbeńder («Álı-Imran» súresi, 103-aıat), – dep buıyrsa, al ardaqty Paıǵambarymyz Muhammed (oǵan Allanyń salaýaty men sálemi bol): «Men ortalaryńnan ketkennen keıin baıaǵy bitpeıtin urys-keriske, daý-damaıǵa qaıta boı aldyrmańdar», – dep qashan da birlik týy astynda bolýdy ósıet etken. Osy rette barshańyzdy ózara baýyrmal bolýǵa shaqyramyn.
Jaratýshy Jabbar Iemiz halqymyzdyń birligi men yntymaǵyn baıandy etkeı. Birligimiz bekem bolǵaı. Ámın!