Qasıetti merekedegi qaıǵyly oqıǵa

Izraıl Densaýlyq saqtaý mınıstr­li­gi japa shekken 150-den astam adamǵa kó­mek kórsetilgenin málimdedi. Aýyr hal­de jatqan naýqastardyń da sany ósip jatyr.

Premer-mınıstr Bınıamın Ne­tanıahý oqıǵany «úlken apat» dep atap, qatty alańdatqanyn, jaralylardyń tezi­rek saýyǵýyn tileıtinin jetkizdi.

Máseleniń mánisine oralsaq, qasıetti mere­keni atap ótýge Izraıldiń túkpir-túkpirinen on myńdaǵan adam jınalǵan. Ataýly is-shara kezinde bórenelerdiń biri qulap, adamdar birin-biri ıtermeleı bastapty. Keıbir BAQ oqıǵa ornynda adamdardyń denesi jatqanyn jazady. Alaıda Izraıl úkimeti buǵan qa­tysty resmı málimdeme bermedi. Aýyr ja­raqat alǵandardy tikushaqpen tasymal­daǵan. Taý basynda uıaly baılanys nashar bolsa kerek, úreılengen adamdar ja­qyndarymen baılanysa almaǵan.

Quqyq qorǵaý organdarynyń ókilderi jınalǵandardyń biri súrinip ketip, adam­darǵa keleńsizdik týǵyzdy, odan jınal­ǵan jurt birin-biri ıtermelep, sońynda ondaǵan adam qulady deıdi. Al jı­nal­ǵandar bolsa oqıǵanyń naqty qalaı bastalǵanyn bilmeıtinin aıtady. Alaıda úlken apattyń bolǵanyn jasyrmaıdy.

Bul apat jaqynda ǵana qatań karan­tındik talaptardan bas tartyp, qalypty ómirge qaıta orala bastaǵan Izraıl úshin úlken soqqy bolyp otyr. Bıliktegiler de bul keleńsizdiktiń kútpegen jerden kel­genin aıtýda. «Endi ǵana burynǵy qalpy­myzǵa kelip mereke toılaýǵa shyǵyp edik. Beıbit kúnde ondaǵan adam qaza tapty. Bul – úlken apat», deıdi halyq.

Jınalǵan halyqtyń kóbi – ortodoks evreıler. Olar jyl saıyn aldyn ala belgilengen kúni  Meron taýynyń basyna dástúrli túrde jınalady. Búginge deıin jetken derekter boıynsha belgili danyshpan Rabbı Shımon dál osy taýda jerlengen. Halyq oıshyldyń basyna táý etip, qulshylyq jasaýǵa jınalady. Bıyl qasıetti orynǵa 100 000-nan astam adam kelgen. Bul is-shara evreıler úshin qajylyq ispettes. Taý basyna barýdy uıymdastyratyn arnaıy kompanııalar da qarastyrylǵan. Máselen, bıyl eldiń túkpir-túkpirinen keletin halyqqa 650 avtobýs daıyndalǵan.

«Hatsala» qutqarý qyzmetiniń dırektory Elı Bır bıylǵy is-sharaǵa adam­dar kútkendegiden kóp kelgenin aıtady. Bas­shynyń málimdeýinshe, alań odan edáýir az adamǵa daıyndalǵan. Adamdardyń artyq qozǵalysynyń qıyndyq týdyrýy da sodan eken. Apat saldaryn joıý men qutqarý jumystary  úshin 5 myń polısııa qyzmetkeri jumyldyrylǵan.

Eldegi medısına qyzmetkerleri koronavırýs pandemııasyna qatysty qatań shekteýler alynǵanymen, kópshilik jerde jınalý áli de qaýipti ekenin aldyn ala eskertken. Oqıǵa ornynda bolǵandar apat adamdarǵa qolaısyzdyqtan týdy degenge sener emes. Telearnalarǵa bergen suhbattarynda kýágerler basynda bomba jaryldy dep oılaǵanyn aıtypty.

Degenmen, kópshilik bul oqıǵany belgi dep qabyldaýda. «Rabbı Shımonnyń ózi men barlyǵynyń kúnásin keshiremin» dedi. Al dál Rabbı Shımonnyń jerlengen jerinde osyndaı apat bolyp jatsa, onda jerdegi qaýym óz áreketin saralap, ózin ózi tergeýge alýy tıis. Bul – belgi», deıdi halyq.

Qutqarý qyzmetimen qatar, eriktiler de jumysqa tartyldy. Olar «Qansha apatty jaǵdaıda jumys istesek te mynadaı apatty birinshi ret kórip otyrmyz. Eshqandaı kúshtiń aralasýynsyz, tabıǵı faktorlarsyz adamdardyń qaıtys bolǵany tańǵaldyrady. Jedel járdemmen talaı jyl jumys istedim, degenmen dál osy syndy oqıǵaǵa alǵash ret tap bolyp turmyn», deıdi Lazar Hıman esimdi erikti.

Byltyr koronavırýs pandemııasyna baılanysty taý basyna jınalýǵa tyıym salynǵan. Bıyl Izraıldiń vaksınalaý baǵdarlamasy oń nátıje berip, halyqtyń 54 paıyzy ekpe saldyrǵannan keıin úkimet qatań shekteýlerdi alyp tastaǵan. Bul apat úkimetti jańa shekteýler qoıýǵa májbúrleýi múmkin.