QR Premer-Mınıstri Asqar Mamınniń tóraǵalyǵymen ótken Úkimet otyrysynda Ulttyq ekonomıka mınıstri Áset Erǵalıev, «Atameken» UKP tóraǵasy Abylaı Myrzahmetov, «Damý» kásipkerlikti damytý qorynyń basqarma tóraǵasy Gaýhar Bóribaeva baıandama jasady, dep habarlaıdy Egemen.kz
«Shaǵyn jáne orta bıznesti damytý – ekonomıkanyń turaqtylyǵyn qamtamasyz etýdiń mańyzdy faktorlarynyń biri. Bıznestiń qarqyndy damýyna barynsha qolaıly jaǵdaı jasaý úshin aýqymdy konstrýktıvti jumys júrgizilip jatyr. Sonymen qatar pandemııa óz túzetýlerin engizdi, shekteýlerden shaǵyn jáne orta bıznes zardap shekti», dedi A. Mamın.
Premer-Mınıstr Úkimet turaqty túrde «Atameken» UKP-men jáne óńirlik kásipkerler keńesterimen birge bıznesti asa tolǵandyratyn máselelerdi jedel qarap, olar boıynsha tıisti sheshimder qabyldaıtynyn atap ótti. Atqarylǵan jumys nátıjesinde qyzmetine shekteýler áser etetin ShOB sýbektilerin qoldaýdyń 60-tan astam qosymsha sharalary qarastyrylǵan 2021 jylǵa arnalǵan ekonomıkalyq ósimdi qalpyna keltirý jónindegi keshendi jospar ózektendirildi. Birinshi kezekte bul sharalar birqatar salyqtyq jeńildikter turǵysynan bızneske júktemeni azaıtýǵa jáne salyqtyq ákimshilendirýdi jeńildetýge, jeńildikti qarjylandyrýǵa qoljetimdilikti keńeıtýge, memlekettik satyp alýǵa qoljetimdilikti ońaılatýǵa, sondaı-aq kásipkerlik qyzmetti qaıta retteýge qatysty.
Bıyl ShOB-tyń qarjylandyrýǵa qoljetimdiligin keńeıtý aıasynda shamamen 47 myń jobany qamtı otyryp, 2,5 trln teńgeden astam jeńildikti nesıe beriledi. Kásipkerlikti qoldaý baǵdarlamalary boıynsha bıznes ótinimderin qaraý merzimderin 21-den 5 jumys kúnine deıin qysqartý boıynsha jumys júrgizildi. Sýbsıdııalaý jáne nesıelerdi kepildendirý aıasynda memlekettik qyzmetterdi sıfrlandyrý bıyl 97%-ǵa deıin ulǵaıdy.
2021 jylǵy 1 sáýir men 1 shilde aralyǵynda ShOB sýbektileri úshin eńbekaqy tóleý qorynan barlyq salyqtardy tóleýdi keıinge qaldyrý múmkindigi berildi. Bul bızneske shamamen 200 mlrd teńgeni saqtaýǵa múmkindik berdi. ShOB sýbektileriniń salyqtyq jáne kedendik bereshegin májbúrlep óndirip alý 2021 jylǵy 1 shildege deıin toqtatyldy. Bul bızneske aınalym kapıtaly úshin 279 mlrd teńgeni bosatýǵa kómektesedi. Ekinshi deńgeıli bankterdegi kredıtter boıynsha tólemderdi 2021 jylǵy 1 shildege deıin keıinge qaldyrý jóninde sharalar qabyldandy. Keıinge qaldyrylǵan tólemder kólemi 750 mlrd teńgeni quraıdy.
«Bizdiń qazirgi mindetimiz – kásipkerlerge bıznesti damytýǵa qoldaý kórsetý. Qabyldanyp jatqan sharalar bıyl ekonomıka ósimi qurylymynda 0,8 paıyzdyq tarmaqqa deıin qalyptastyrýǵa múmkindik beredi», dedi A. Mamın.
Úkimet basshysy Ekonomıkalyq ósimdi qalpyna keltirý jónindegi ózektendirilgen keshendi jospardyń ýaqytyly oryndalýyn, bıznesti salyqtyq yntalandyrý boıynsha zańnamalyq túzetýler paketin qabyldaýdy jáne 2021 jylǵy 1 maýsymǵa deıin Parlamentte tıisti jumys júrgizýdi tapsyrdy. Memlekettik organdarǵa, ákimdikterge, «Damý» qoryna «Atameken» UKP-men birlesip, bıznestiń barlyq qoldaý túrlerin alý jónindegi ótinimderin qysqa merzimde qaraý tapsyryldy.