Nur-Sultan qalasynda aldaǵy 7 mamyr – Otan qorǵaýshylar kúni jáne 9 mamyr – Jeńis kúni merekelerine arnalǵan is-sharalar tizimi jarııalandy. Karantındik sharalarǵa baılanysty is-sharalardyń bári onlaın ótedi, dep habarlaıdy Egemen.kz elorda ákimdiginiń resmı saıtyna silteme jasap.
Elordanyń mektepterinde 6 mamyrǵa deıin Otan qorǵaýshylar kúni men Uly Jeńis kúnine arnalǵan synyp saǵattary men kýratorlyq saǵattary, áskerı-patrıottyq tárbıedegi ánderdiń onlaın baıqaýy ótedi. Onlaın sharalardy Instagram jelisindegi @astana_jastary jáne @jas_sarbaz_nursultan paraqshalarynan kórýge bolady.
Elordanyń «Bilim-ınnovasııa» lıseı-ınternaty» 5 mamyr kúni merekege oraı «Bir úzik syr» suhbatyn ótkizedi. Syr-suhbatty bilim mekemesiniń Instagram jelisindegi resmı paraqshasynan tamashalaýǵa bolady.
№4 qalalyq emhanada Uly Otan soǵysy ardagerleri men oǵan teńelgen tulǵalarǵa arnap medısınalyq tekserý uıymdastyrylady. Al №2 qalalyq emhana Uly Otan soǵysynyń ardagerlerine arnalǵan úı kútimi jónindegi dárigerler keńesin ótkizedi. Bul sharalar 6 mamyrǵa deıin jalǵasady.
«Saıası qýǵyn-súrgin jáne totalıtarızm qurbandarynyń «ALJIR» memorıaldy-murajaı kesheni «Malınovka» izdeý klýbymen birlesip, 5 mamyr kúni tyl ardagerlerimen, «Aýǵan soǵysynyń ardagerleri men múgedekteri» QB ókilderimen, sondaı-aq «Erlikke taǵzym, ardagerge – qurmet» áskerı qyzmetshilerimen kezdesý ótkizedi.
Sonymen qatar 5-10 mamyr aralyǵynda Uly Otan soǵysynyń jaýyngerlerine arnalǵan monýmentaldy keshenge, «Otan qorǵaýshylar» memorıaldyq keshenine, M.Mámetova, B.Momyshuly eskertkishterine onlaın ekskýrsııa júrgiziledi. Tolyq málimetterdi Mádenıet basqarmasynan, Birikken murajaılar dıreksııasynan, tarıhı-mádenı murany saqtaý ortalyǵynan alýǵa bolady.
7 mamyr – Otan qorǵaýshylar kúni «Aqıqat pen ańyz» konsert-spektalin «Qazaqstan» telearnasy usynady.
Otan qorǵaýshylar kúnine oraı «ANK Live» stýdııasynyń tikeleı efıri QR Qorǵanys mınıstrliginiń ókilderimen ótetin is-sharany usynady. Onlaın sharany Facebook, Instagram áleýmettik jelilerinen kórýge bolady.
Nur-Sultan qalasy fılarmonııasy orkestriniń qatysýymen 8 mamyr kúni 22 UOS ardagerine arnap jyljymaly konsert uıymdastyrylady. Sol kúni «Jas sarbaz» áskerı-patrıottyq jobasy aıasynda ardagerlerge azyq-túlik sebetteri tabys etiledi.
Al 9 mamyr – Uly Jeńis kúnine oraı elorda kóshelerinde «Jeńis joldarymen» mobıldi is-sharasy ótedi. Dál osy kúni «Habar» telearnasynda «Er esimi – el esinde» konserti jurtshylyq nazaryna usynylatynyn eske sala keteıik.
Aıta keteıik, elordadaǵy is-sharalardyń bári sanıtarlyq normalardy tolyqtaı saqtaı otyryp ótedi.