Parlament Senatynyń depýtaty Rysqalı Ábdikerov jumys saparymen Qaraǵandy oblysynyń Ulytaý aýdanynda boldy. Bul týraly Egemen.kz Senattyń baspasóz qyzmetine silteme jasap habarlaıdy.
Ulytaý aýdandyq polısııa bólimi qyzmetkerlerimen kezdesý barysynda Rysqalı Qalıaqbaruly mal urlyǵyn aldyn alý, esirtkige qarsy kúres, zorlyq-zombylyqty boldyrmaý qajettigin atap ótti. Sonymen qatar medıasııa arqyly sotqa jetkizbeı tatýlastyrý, sot júıesin qalyptastyrý, polısııa qyzmetkerlerin turǵyn úımen qamtasyz etý qajet ekendigi aıtyldy.
R.Ábdikerov sonymen qatar sapar barysynda «Ulytaý» qoryq-murajaıyn aralady jáne bıylǵy jyly paıdalanýǵa beriletin týrıstik sapar ortalyǵynyń jumysymen tanysty. Senator aýdanda tarıhı týrızm, ekotýrızm, agrotýrızm jáne kıeli mekenderdi aralaý baǵyttaryn damytý, týrıster úshin qyzmet kórsetý sapasyn artýǵa asa kónil bólý qajettigin atap ótti.
Senat depýtaty Rysqalı Ábdikerov Ulytaý aýdan ákimdiginde aýdan turǵyndarymen, jurtshylyqpen jáne aktıv múshelerimen kezdesti. Júzdesýde aýyl turǵyndary kókeıde júrgen máselelerin ortaǵa saldy. Ásirese, aýyzsý men elektr energııasy, Ulytaý-Jezqazǵan baǵytyndaǵy jol qatynasy jáne sol baǵytta júretin jolaýshylar kóliginiń negizgi máseleleri talqylandy. Aýdandyq maslıhat depýtaty Jarqynbek Bólendın aýyl sharýashylyǵyn damytýǵa Úkimet tarapynan qoldaý kórsetilýin surady.
Senat depýtaty Jezdi kentinde salynyp jatqan sport kesheniniń qurylysyn aralap kórdi. Senator bıylǵy jyl Qaraǵandy oblysyndaǵy dene shynyqtyrý jáne sport salasy úshin qarqandy jobalarǵa toly ekenin jáne bul Memleket basshysy Qasym-Jomart Toqaevtyń elimizde buqaralyq sportty damytý jónindegi tapsyrmalarynan týyndaǵan mindettermen tikeleı úndesip otyrǵanyn atap ótti.