1 mamyrdan bastap Qazaqstanda arnalar arqyly sý berýdiń ortasha ótkizý tarıfi tekshe metrine 1,826 teńgeden 2,057 teńgege deıin, onyń ishinde ózdiginen aǵatyn sý beretin aýyl sharýashylyǵy taýaryn óndirýshiler úshin 0,376 teńgeden 0,66 teńgege deıin ulǵaıady.
Ulttyq ekonomıka mınıstrliginiń Tabıǵı monopolııalardy retteý komıteti departamentiniń tıisti buıryǵy 1 mamyrda kúshine enedi. Eske sala keteıik, Ekologııa, geologııa jáne tabıǵı resýrstar mınıstrligi Sý resýrstary komıtetiniń «Qazsýshar» RMK arnalar arqyly sý berýge arnalǵan tarıftiń ádil deńgeıin belgileý týraly usynysqa bastama jasaǵan bolatyn.
Qazaqstandaǵy jerústi kózderinen arnalar arqyly sý berý tarıfteri (sý tarıfteri) ırrıgasııa úshin sýmen jabdyqtaý júıelerin paıdalanýǵa jáne olarǵa tehnıkalyq qyzmet kórsetýge jumsalatyn barlyq shyǵyndardy jabý úshin jetkiliksiz jáne aýyl sharýashylyǵyndaǵy óndiristik shyǵyndardyń eleýsiz bóligin ǵana quraıdy. Máselen, sýdyń ortasha aǵymdaǵy quny negizgi aýyl sharýashylyǵy daqyldaryn óndirýge jumsalatyn shyǵyndardyń 1%-dan kemin quraıdy. Sonymen qatar qarajattyń jetispeýshiliginen ınfraqurylymnyń nasharlaýy sýdyń kóp mólsherde joǵalýyna ákelýde. Aýyl sharýashylyǵynda shyǵyndar 45%-ǵa jetedi. Sondaı-aq tarıf belgileýdiń qazirgi qurylymy, ásirese aýyl sharýashylyǵynda, sý resýrstaryn tıimdi paıdalanýdy yntalandyrmaıdy. Tarıf sońǵy tutynýshyǵa sýdyń ekonomıkalyq qundylyǵy bar ekenin jáne ony utymdy bólý jáne paıdalaný kerektigin kórsetýi kerek. Osylaısha, sýdy paıdalanýdyń tıimdiligin arttyrý, ony únemdeýge yntalandyrý jáne tıisti paıdalaný, tehnıkalyq qyzmet kórsetý jáne aýyl sharýashylyǵyndaǵy ınfraqurylymdy bolashaqta damytý úshin jetkilikti túsimderdi qamtamasyz etý maqsatynda Úkimettiń 2018 jylǵy 28 jeltoqsandaǵy №904 qaýlysymen bekitilgen sýarmaly jerlerdi damytý jónindegi is-sharalar josparynda sýarmaly sýdy berý tarıfin 10 jyl ishinde aýyl sharýashylyǵy taýaryn óndirýshiler shyǵyndarynyń úlesin 4% - ǵa deıin birtindep jetkizý aıqyndalǵan.