Burynǵy densaýlyq saqtaý mınıstri Eljan Birtanov sotta sóz sóıledi. Ol tergeý organdary oǵan áli aıyp taqpaǵanyn málimdedi, dep habarlaıdy Egemen.kz.
«Keshe birqatar buqaralyq aqparat quraly prokýrordyń maǵan aıyp taqqany týraly qate nemese ádeıi jazylǵan aqparat taratty. Sotqa qatysqan BAQ ókilderine maǵan áli aıyp taǵylmaǵanyn, tergeý áli júrip jatqanyn habarlaǵym keledi. Búgingi tańda kúdiktiń negizdiligi men kúdikti retinde meniń quqyǵymdy shekteý týraly másele ǵana qaralyp jatyr.
О́tinishti zerdelep, urlyq pen jymqyrý kúdikteriniń zańdylyǵy men negizdiligin rastaıtyn senimdi derekter joq ekenin aıtqym keledi. Sebebi urlyq jasalǵan joq. Men densaýlyq saqtaý mınıstriniń mindetterin atqarǵanda osy iste de, basqalarynda da qandaı da bir sybaılas jemqorlyqqa qatysym joq ekenin taǵy da jarııa málimdeımin», dedi Birtanov.
Eske salaıyq, keshe sotta prokýror Tólegen Jarasbaev 2020 jyldyń qazanynan beri qamaýda otyrǵan burynǵy densaýlyq saqtaý mınıstri Eljan Birtanovqa qandaı aıyp taǵylǵanyn aıtqan bolatyn. Densaýlyq saqtaý mınıstrliginiń burynǵy basshysy 12 jylǵa bas bostandyǵynan aıyrylýy múmkin.
21 sáýirde densaýlyq saqtaý eks-mınıstri Eljan Birtanovqa úı qamaq merzimi uzartylǵan, biraq belgili bir ýaqytta páterden shyǵýǵa ruqsat etilgen bolatyn.