QR Parlamenti Senatynyń tóraǵasy Máýlen Áshimbaev Qazaqstandyqtardy Otan qorǵaýshy kúnimen Facebook paraqshasynda quttyqtady, dep habarlaıdy Egemen.kz.
«Qurmetti dostar!
Barshańyzdy Otan qorǵaýshy kúnimen shyn júrekten quttyqtaımyn!
Bul – aıbyndy armııamyzdyń dańqyn asyratyn jáne jaýyngerlik rýhty dáripteıtin aıryqsha mereke. Biz egemen elimizdiń Qarýly Kúshterin qurý arqyly Táýelsizdigimizdiń berik qalqanyn, beıbitshilik pen turaqtylyqtyń myzǵymas negizin qalyptastyrdyq.
Memleket basshysy atap ótkendeı, qazirgi tańda Qarýly Kúshterimiz jerimizdiń tutastyǵy men elimizdiń tynyshtyǵyn qas qaqpaı kúzetip tur. Otan qorǵaý jolynda sap túzegen sarbazdarymyz batyr babalarymyzdyń erlik dástúrin laıyqty jalǵastyryp keledi. Shyn máninde, bizdiń armııamyz áýede, jerde jáne teńizde jahandyq básekege qabiletti qýatty kúshke aınaldy. Indetpen kúres kezinde de áskerimiz antqa adaldyqtyń ozyq úlgisin kórsete bildi. Aldaǵy ýaqytta da Qarýly Kúshterimizdiń áleýeti artyp, qorǵanysymyz kúsheıe bersin.
Merekemen quttyqtaı otyryp, ár shańyraqqa shattyq, azamattarymyzǵa amandyq tileımin. Árqashan aspanymyz ashyq, elimiz tynysh bolsyn!», delingen quttyqtaýda.