Túrkııada jasalyp jatqan koronavırýsqa qarsy vaksına bıyl kúzde tolyq daıyn bolady, dep habarlaıdy Egemen.kz Anadoly agenttigine silteme jasap.
Bul jaıynda Túrkııa prezıdenti Rejep Taıyp Erdoǵan arnaıy brıfıngte aıtty.
«Túrkııada koronavırýs ınfeksııasyna qarsy otandyq vaksına jasaý jumysy belsendi jalǵasyp jatyr. Bıylǵy qyrkúıek-qazan aılaryna deıin osy jumystyń nátıjesin kóremiz degen nıet bar» dep atap ótti túrik kóshbasshysy.
Onyń aıtýynsha, otandyq vaksına Túrkııadaǵy suranysty ǵana jaýyp qoımaı, basqa elderge de taratylady.
«Ankara suranys joldaǵan álemniń kez kelgen eline vaksına jetkizýge daıyn» dedi Rejep Taıyp Erdoǵan.
Túrkııa prezıdenti buǵan deıin Reseı prezıdenti Vladımır Pýtınmen reseılik Spýtnık V vaksınasyn satyp alý jaıyn talqylaǵan bolatyn.
«Bul jerde áńgime Túrkııaǵa jetkiziletin ekpeniń óte qomaqty kólemi jaıynda bolyp otyr. Sosyn biz Túrkııada birlesken ónerkásipti iske qosamyz» dep túıindedi R.Erdoǵan.