«Avgýst» fırmasy hımııalyq preparattardyń kómegimen egis egýdi jalǵastyrýda, dep habarlaıdy Egemen.kz.
Jýyrda jol túsip Jambyl aýdanyna baryp qaıttyq. Egiske shyǵý Soltústikte 15-20 mamyrdag bastalady. О́ıtkeni, egis alqaptarynyń kóbinde bul merzimge deıin qarǵyn sýy qurǵamaıdy, tipti qurǵaǵan kúnniń ózinde jer áli jylymaı, tuqymnyń ónip ketýine jol bermeıdi.Biz barǵan aýyl erte kezde aýdan ortalyǵy bolǵan Maıbalyq edi. Jınalǵan kópshiliktiń arasynan bir jigitter «Avgýst» astyq egýge kirisip jatyr» degen sózdi aıtqanyn qulaǵymyz shalyp, eleń ete qaldyq. «Avgýst» degen fırmanyń ataýy ekenin bilgen soń jer áli sýyq emes pe, tuqym óne almaı, úsip qalmaı ma desek «olar qaısybir hımııalyq preparattardy qoldanady, tuqymy úsimeıdi, astyqtary tez shyǵady. Biraq olardyń astyǵyna qus qonbaıdy, jylqy mańaılamaıdy, sıyrlar aýyz salsa keıde ishi kebedi» ,dep aıtyp turǵan jigitter bizdi tań qaldyrdy. Mal jemeıtin, qus qonbaıtyn astyqty sonda adam jeı me degen suraq jýrnalıstik áýestigimizdi týdyryp, ertesine aýdan ákimi Marat Eskendirovke habarlastyq. Ol bul máseleden habary joq ekenin, óziniń bul qyzmetke kelgenine bir-aq jyldaı bolǵandyqtan onyń mánisin negizinen aýylsharýashylyǵy bóliminiń bastyǵy Borıs Petrov biletinin aıtty. Nómirin alyp, endi Borıs Petrovıchke habarlastyq. Bul kisi mán-jaıdy birshama tolyq biledi eken.
Osydan tórt jyl buryn «Avgýst» atty Reseıdiń fırmasy bankrotqa ushyraǵan «Aq jer-2010» fırmasynyń jerin sottyń sheshimimen bolǵan aýksıonda sot oryndaýshydan satyp alǵanyn aıtty. Árıne, jerdiń ózin emes «jer ýchaskesin paıdalaný quqyǵy» ekeni belgili. Sonda qansha kólemdegi jerdi jalǵa aldy dep suradyq. Oǵan Arqan, Blagoveshenka, Mır aýyldyq okrýgteriniń 15 myń gektardaı jerin alǵany aıtyldy. Sonymen birge B.Petrov olardyń astyǵy jaqsy shyǵatynyn, byltyrǵy birshama qurǵaq bolǵan jyldyń ózinde gektarynan 23,3 sentnerden astyq alǵanyn aıtty.«Avgýst» degen fırmanyń ózi ne ekenin, qandaı ekenin bilmek bolyp, ınternetti ashtyq. Ortalyq keńsesi Máskeý qalasynda ornalasqan bul fırmanyń negizgi kásibi aýylsharýashylyǵy ónimderin qorǵaıtyn, qoldaıtyn hımııalyq preparattar shyǵarý eken. О́zderiniń jazýyna qaraǵanda ósimdikterdi qorǵaıtyn preparattardy ázirlep, óndirip jáne aqparattyq-tehnologııalyq jaǵynan qamtamasyz etýmen aınalysady. Olar Qazaqstanmen ǵana emes TMD elderimen de baılanysy bar bolyp shyqty. «Bizdiń negizgi áriptesterimiz jer ıgerýshiler. Olarmen shynshyl jáne uzaq ýaqyttyq áriptestik baılanys – bizdiń tabysymyzdyń kilti. Maqsatymyz ósimdikterdi qorǵaıtyn hımııalyq quraldardy jasaý boıynsha álemdegi aldyńǵy qatarly ondyqtyń qataryna ený» delingen olardyń anyqtamalyǵynda.Alaıda bul fırma keıin astyq ósirýmen aınalysa bastaǵan. Alǵan alqaptarynda ózderiniń jasaǵan hımııalyq preparattaryn tájirıbeden de ótkizedi eken. Sonyń ishinde Qazaqstanǵa 2017 jyldan bastap kirgen. Jazýlaryna qaraǵanda 2024 jylǵa qaraı jalpy egis kólemin 250-300 myń jetkizýdi kózdegen.Fırma Qazaqstanǵa ýlaǵyshtar, gerbısıdter, desıkanttar, fýngısıdter, ınsektısıdter, ósýdi rettegishter, defolıanttar jetkizedi eken. Anyqtamalyǵynda bulardyń bári de ósimdikterdiń jaýlaryn ýlap, qýratatyn zattekter. Keıbiri tipti adam men jan-janýarlarǵa da qaýipti. Mysaly, desıkanttar qaýipsizdik tehnıkasyn paıdalanyp qoldanbasa adamdy da ýlaıdy. «Avgýst» fırmasy ózderi jasaıtyn bolǵan soń olardy kóp qoldanady. Al munyń ekologııaǵa qanshalyqty zııan keltiretinin eshkim bilmeıdi. Biz oblys aýylsharýashylyǵy basqarmasynyń biraz qyzmetterine habarlasyp edik, eshkim mándi jaýap bere alǵan joq.Eń bastysy... eń bastysy, «Avgýst» fırmasy birneshe jyl hımııalyq preparattardyń kúshimen ónimdi astyq alar-aý, biraq sonsha hımıkatty boıyna sińirgen jer ne bolady? Birneshe jyldan keıin ol boıyndaǵy nárinen aırylyp, qý dala bolyp qalmaı ma? Osy suraqtar tıisti qyzmetterdi alańdatýy kerek sııaqty.