2021 jyldyń 10 mamyry kúni elordada belgili ekolog, professor, ǵalym Musaǵalı Dýambekov atyndaǵy alleıa men memorıaldyq taqtanyń ashylý saltanaty ótti, dep habarlaıdy Egemen.kz.
Qoǵamdyq isterden bólek respýblıkalyq deńgeıdegi agenttikterge jetekshilik etken, qorshaǵan ortaǵa janashyrlyqpen qaraǵan Musaǵalı Dýambekov byltyr 28 shilde kúni álemdi jaılaǵan indet saldarynan kóz jumdy. Tiri bolǵanda 5 mamyr kúni 60 jasqa tolar edi.
Búgin onyń qurmetine jańa alleıa ashylyp, 60 túp qaraǵaı aǵashy egildi. Is-sharaǵa kelýshilerdiń sózinshe, saıabaq qalanyń sánin keltirip qana qoımaı, óskeleń urpaqty ónegeli ómir ıesiniń úlgi alarlyq isterine úndeıtin bolady. Alleıa Nur-Sultan qalasy ákimdigi men Qazaqstannyń tabıǵatty qorǵaý uıymdarynyń qaýymdastyǵy qoldaýymen ashylǵanyn aıta ketken jón.
«Musaǵalıdy keıbireýler memlekettik qyzmetker dep oılaıdy, endi biri saıasatker retinde kóredi. Al men ony qoǵam qaıratkeri dep sanaımyn. Ekologııaǵa nazar aýdarý, máselelerin sheshý jolyndaǵy isteri bólek áńgime... Ol ár iske shyn júregimen berilip jáne óziniń azamattyq boryshyn ótep turǵandaı kirisetin. Mysalǵa, M. Dýambekov birqatar adamnyń quqyqyǵyn qorǵaýǵa atsalysty. Sot otyrystaryna qatysyp, baspasóz jıyndaryn ótkizip júrdi. Sondaǵy maqsaty adamdarǵa kómektesý edi. Sol úshin ózi de jaýapqa tartylǵan kezderi boldy. Al Aýyl sharýashylyǵy mınıstrliginde jumys istegen kezderinde salanyń basty olqylyqtaryn zańdardy saraptamadan ótkizý arqyly túzetýge talpyndy», deıdi Qazaqstandaǵy Parlamentarızmdi damytý qoǵamdyq qorynyń tóraıymy Záýresh Batalova.
Ekologty eske alý sharasyna jınalǵandardyń arasynda qoǵam belsendilerinen bólek, dos-jarańdary da kóp júrdi. Olar áserli estelikterimen bólisip, is-sharanyń mańyzyna toqtaldy. Zamandastary men áriptesteri bolsa, ǵylymı izdenisi jaıly sóz etip, onyń tabıǵat tazalyǵyna ǵana emes, azamattyq qoǵamnyń taza bolýyna da úles qosqanyn jetkizdi.
Sóz sóıleýshiler legi aıaqtalǵan soń, marqumnyń arýaǵyna quran baǵyshtaldy. Odan soń qoldaryna kúrek alyp, qaraǵaı aǵashtaryn otyrǵyzdy.
Aıta keteıik, Musaǵalı Dýambekov 100-den astam ǵylymı jarııalanymnyń jáne ónertabystyń avtory. Onyń «Qazaqstan ekologııasy», «Kaspıı teńiziniń ekologııalyq qaýipsizdigi», «Ekologııalyq menedjment» sekildi taǵy da basqa kitaptary jaryq kórgen.