Otandasymyz, alpınıst Maqsut Jumaev Táýelsizdiktiń 30 jyldyǵyna oraı Qazaqstannyń týyn Gımalaı altylyǵynda – Lobýcheniń ońtústik shyńyna alyp shyqty, dep habarlaıdy Egemen.kz
Tanymal sportshy Katmandýǵa qaıtqannan keıin baılanysqa shyqty. Onyń sózinshe, Nepaldaǵy epıdemııalyq jaǵdaıǵa baılanysty lokdaýn jarııalanǵan. Maqsut Jumaev áýe bıletterin qaıtarýǵa májbúr bolǵan, endi karantınniń jeńildeýin kútip otyr. Alaıda alpınıst óz mıssııasyn sátti oryndap shyqqan.
«Keshe 11.30-da 6119 metr bıiktiktegi Lobýche shyńyn baǵyndyrdyq. Túngi 03.00 shamasynda shyqtyń, aýa raıy jaqsy boldy. Aınalamyzdaǵy segizmyńdyqtar anyq kórinip turdy. Biraq saǵat tańǵy 09.00 shamasynda aýa raıy buzylyp ketti, qar jaýyp, kórý 50 metrge deıin nasharlady. Qar jaýyp ketkenine qaramastan toqtamadyq, tek qadamdy báseńdettik. Tobymyz asyqpaı shyńǵa jetti», deıdi M.Jumaev.
Sportshy shyńda uzaq ýaqyt turmaǵan. Bar kúshin týlarmen sýretke túsip, quttyqtaý vıdeosyn túsirýge jumsaǵan. Sosyn qaıtý kerek bolǵan.
«Bárin tastap, tómenge qaıtadan túsip ketkim kelgen kezder boldy, sebebi qar jarma sııaqty jaýyp ketti. Biraq mıssııany oryndaý mindeti turǵanyn túsindim, ol – Lobýche shyńyna Tý tigý. Týmen sýretke túsip, quttyqtaý vıdeosyn jazyp, tómen qaraı túse bastadyq. Lagerge keshke qaraı jettik», deıdi sportshy.
Sportshynyń Gımalaı shyńyna jetýdegi maqsaty – Qazaqstannyń Táýelsizdigine 30 jyl ekenin dúnıe júzine tanytý bolǵan.
Búginde qazaqstandyq sportshy Katmandýda. Jumaev mıssııasyn oryndaǵannan keıin Qazaqstanǵa tezirek oralǵysy keletinin aıtady.
«6 mamyrdan bastap Nepalda áýe qatynastary toqtap, lokdaýn jarııalandy. 15 mamyrda lokdan ne qatańdaıdy, ne jeńildeıdi. Biraq Úndistanda epıdemııalyq jaǵdaı qıyn ekenin eskerip, lokdaýn jeńildeıdi dep aıtý qıyn. Biz bazalyq lagerden Katmandýǵa tikushaq arqyly jettik. Osy jerden Qazaqstanǵa oralýdyń joldaryn qarastyrýǵa tyrysamyn. Bul men úshin basty másele», deıdi alpınıst.