Ǵanı Myrzahanov Almaty qalalyq mobıldilik basqarma basshysy bolyp taǵaıyndaldy, dep habarlaıdy Egemen.kz.
Endi ol joldardyń jaǵdaıy men jolaýshylar kóligi jumysyna jaýap beredi. Bul týraly máslıhat sessııasynda qala ákimi Baqytjan Saǵyntaev málim etti.
«Búginge deıin qalalyq mobıldilik basqarmasy basshysy laýazymy bos boldy. Bul qyzmetke búgin Ǵanı Áýezhanuly Myrzahanovty taǵaıyndadym. Ol – jol júıesiniń mamany», dedi Almaty ákimi Baqytjan Saǵyntaev.
Jańa qyzmetke taǵaıyndalǵanǵa deıin Ǵanı Myrzahanov 2016 jyldan bastap «Almaty tazalyq» kásipornynyń basshysy boldy.
Al 2008 jyldan bastap jolaýshylar kóligi jáne avtomobıl joldary basqarmasy basshysynyń orynbasary qyzmetin atqardy. Buǵan deıin Almaty ákimi Baqytjan Saǵyntaev Serik Qusaıynovty óziniń orynbasary etip taǵaıyndaǵan bolatyn. Sonymen qatar Erjan Seıtenov Almaly aýdanynyń ákimi boldy.