DDU COVID-19 aýrýy boıynsha kórsetkishtiń joǵarylaǵany týraly habarlady, dep jazady Egemen.kz.
Amerıka men Eýropany qosa alǵanda, barlyq aımaqta aýrýdyń tómendeýi baıqalǵanyna qaramastan, jalpy kórsetkish ulǵaıǵan. Uıymnyń aıtýynsha, qaýip áli seıilgen joq. Ár óńirde ınfeksııa deńgeıi áli de joǵarylap jatqan jekelegen aımaqtar bar.
Úndistannyń Býksar qalasyndaǵy Gang ózeninen COVID-19-dan qaıtys bolǵan adamdardyń kem degende otyz máıiti tabyldy.
Okrýg ákimshiligi kóz jumǵan adamdardyń denesi kórshi memleketten sýmen aǵyp kelgen bolýy múmkin dep málimdedi. Alaıda jergilikti halyq jaǵalaýda ornalasqan aýyl turǵyndary kremasııa men jerleý rásiminiń qymbat bolýyna baılanysty qaıtys bolǵan adamdardyń denelerin ózenge amalsyzdan laqtyrady dep sanaıdy.
Úndistan koronavırýs ınfeksııasyn juqtyrýdyń jańa jaǵdaılarynyń tirkelýi boıynsha álemde ekinshi orynda. Elde vırýs juqtyrǵandar sany 22,2 mıllıonnan asty.
Ulybrıtanııada uzaq merzimdik qatań shekteýlerden keıin 17 mamyrdan bastap qoǵamdyq oryndar men pabtarda, kafeler men meıramhanalarda kezdesýlerge ruqsat etiledi. Bul tórt kezeńdik karantındik shekteýlerin jeńildetýdiń úshinshi satysy. Bıliktiń aıtýynsha, jappaı vaksınalaýdyń arqasynda eldegi epıdemıologııalyq jaǵdaı aıtarlyqtaı jaqsardy.