2021 jylǵa arnalǵan satyp alý jospary boıynsha halyqqa medısınalyq kómek kórsetýge 1,8 trln teńge, onyń ishinde TMKKK – 1,1 trln teńge, MÁMS – 700 mlrd teńge qarastyrylǵan. Bul týraly OKQ ótken brıfıngte Áleýmettik medısınalyq saqtandyrý qorynyń basqarma tóraǵasy Bolat Tókejanov habarlady, dep jazady Egemen.kz.
«Bıyl biz saqtandyrý qarajaty túsimderiniń boljamyn 150 mlrd teńgege ulǵaıtamyz. Bul aqshany qaıda jumsaý mańyzdy? Pasıent medısınalyq saqtandyrý qorymen kelisimshart jasasqan kez kelgen klınıkada, onyń qaı jerde ornalasqanyna jáne menshik nysanyna qaramastan, sapaly medısınalyq kómek alýy tıis. 1 sáýirdegi jaǵdaı boıynsha Qor 1 363 medısınalyq qyzmet jetkizýshimen shart jasady, onyń ishinde 688-i jeke menshikti klınıkalar, ótken jyly olardyń sany 635 boldy. Halyqqa medısınalyq qyzmet kórsetý úshin tartylatyn jeke menshik jetkizýshilerdiń ósý úrdisi saqtalýda. Bul pasıenttiń eń jaqsy klınıkany tańdaý múmkindigi. Medısınalyq qyzmetterdi jetkizýshilerdiń tizimi Qordyń Fms.kz saıtynda jarııalanǵan», dep atap ótti Bolat Tókejanov.
Aýyldyq jerlerde medısınalyq qyzmetterdiń qoljetimdiligin arttyrý úshin ótken jyly 100 jyljymaly medısınalyq keshen satyp alyndy, bıylǵy jyly barlyq aýyl turǵyndaryna 149 JMK qyzmet kórsetedi, olardyń ishinde beıindi mamandardyń konsýltasııalaryn alýǵa, skrınıngterdi qosa alǵanda, dıagnostıkadan ótýge, zerthanalyq taldaýlar tapsyrýǵa, vaksınasııa jasaýǵa, aýrýhanaǵa jatqyzýǵa joldama alýǵa jáne medısınalyq kómektiń birqatar basqa da túrlerin alýǵa bolady. Birinshi toqsanda «jyljymaly emhanalar» dep atalatyn mobıldi medısınalyq keshender arqyly aýyl turǵyndaryna 231,9 mln teńgege 120 myń medısınalyq qyzmet kórsetildi.
Bolat Tókejanovtyń aıtýynsha, maqsatty toptaǵy pasıentterdi dári-dármekpen qamtamasyz etýge erekshe kóńil bólinedi. 2021 jyly ambýlatorııalyq dári-dármekpen qamtamasyz etýge 152,4 mlrd teńge bólindi, onyń ishinde TMKKK sheńberinde – 122,3 mlrd teńge, MÁMS-30,1 mlrd teńge.
Qor qajetti dári-dármek satyp alýdaǵy kidiristerge jol bermeý úshin aldyn ala avanstyq tólemder túrinde dári-dármekterdi satyp alýǵa qarajat baǵyttaıtyny týraly aıta ketken jón.