Mamandyǵy ekolog-hımık bolǵanymen, Iýrıı Serebrıanskıı – belgili jazýshy, aqyn, «100 jańa esimi» jobasynyń jeńimpazy. Mádenıettanýshylyq qyry jáne bar. Jýyrda A.Pýshkın atyndaǵy oblystyq kitaphanada Dúnıejúzilik kitap kúnine oraı jazýshymen onlaın formatta kezdesý ótti.
Iýrıı Serebrıanskııdiń ádebıetke degen qyzyǵýshylyǵy kishkentaıynan bastalǵan. Ol qolyna alǵan kitapty oqyp qana qoımaı, ár taqyryp tóńireginde óreli oı-tujyrym jasap otyratyn. Qııaly da ushqyr bolyp, er jetti. Jıyrma jasynan bastap ártúrli janrda qalam silteı bastaǵan. Alaıda, mamandyǵy jazýshylyqtan alshaqtaý edi. Birneshe jyl qorshaǵan ortany qorǵaý jáne tabıǵı resýrstar mınıstrliginde, BUU damý baǵdarlamalarynda halyqaralyq ekologııalyq zańnamanyń sarapshysy retinde jumys istedi.
Keıin jeke kásipkerlikpen aınalysýǵa bel býǵan. Kásipkerlikpen qatar, qolyna qalamyn qaıta alǵan. Shyǵarmashylyqqa shyndap kirispes burynOlga Markovanyń jetekshiligindegi «Mýsaget» qoǵamdyq qorynyń ádebı kýrstarynda bilimin jetildirgen. Bilim demekshi, Polshanyń Olshtyn qalasyndaǵy Varmınsk-Mazýr ýnıversıtetin mádenıettanýshy, mádenıetaralyq qatynastar mamandyǵy boıynsha támamdaǵan. Onyń talanty Reseıde, Qazaqstanda, Polshada birneshe ret moıyndalyp, kóptegen marapatqa ıe bolǵan.
Aıta ketsek, «Knıga o vkýsnoı ı zdorovoı kazahstanskoı lıteratýre» atty kitaby bıyl «Bir el – bir kitap» aksııasynyń tizimine endi. «Destination. Dorojnaıa pastoral» povesi Abaı atyndaǵy QazUPÝ fılologııa kýrsynyń oqytý baǵdarlamasyna engizilgen. Al «Prajakı» povesi oqýshylardyń orys tilinen ashyq halyqaralyq olımpıadasy baǵdarlamasynda paıdalanylǵan.
– Men ınjener-geologtardyń otbasysynda dúnıege keldim. Kitapty bas almaı oqydym desem, artyq aıtpaımyn. О́se kele jazýǵa talpyndym. 1997 jyly ál-Farabı atyndaǵy Qazaq ulttyq ýnıversıtetin hımık-ekolog mamandyǵy boıynsha bitirip, biraz ýaqyt óz salamda eńbek ettim. Shynyn aıtqanda, túkke paıdasy joq qaǵaz jumystary ýaqytymdy urlap jatqandaı kórindi. Men úshin ár mınýt mańyzdy. О́lshep berilgen altyn ýaqytty paıdasyz iske jumsaǵym kelmedi. Sondyqtan da janym súıetin jumyspen aınalysýǵa bel býdym, – dep aǵynan jaryldy Iýrıı Serebrıanskıı.
Jazǵan saıyn qyzmeti de osy salaǵa oıysa bastaǵan. 2012 jyldan bastap Qazaqstandaǵy polıak dıasporasynyń «Ałmatyński Kurier Polonijny» jýrnalynyń redaktory qyzmetine turyp, Qazaqstan, Reseı jáne Polshadaǵy basylymdarmen yntymaqtasa bastaǵan. Tájirıbesi tolysqan soń eki jyldaı Almatydaǵy ashyq ádebıet mektebinde oqytýshy bolyp jumys istedi.
Prozashy jáne aqyn retinde shyǵarmalary «Prostor», «Knıgolıýb», «Drýjba narodov», «Znamıa», «Vozdýh», «Den ı noch», «Novaıa ıýnost», «Prolog», «Iýnost», «Novaıa realnost» syndy ádebı jýrnaldarda jarııalanyp turady.
2013 jyly Iýrıı Serebrıanskıı «Fashion TV Award» halyqaralyq marapatyna usynylyp, jeńimpaz bolǵanyn da aıtýǵa bolady. Alaıda, keıbir derekterde Iý. Serebrıanskıı polıak jazýshy dep tanystyrylyp júr. Polshalyqtardyń da súıikti jazýshysy ekeni belgili, biraq kindigi Qazaqstanǵa baılanǵan. Tipti «Pragakı» povesin Polshada jazǵanymen, ol – Qazaqstan týraly shyǵarma.