Qylmystyq prosestiń jańa formaty ońaı ári qolaıly

Jyl basynan beri elimizde úsh býyn­dy model boıynsha qylmystyq prosester negizgi qujattardy prokýrormen onlaın formatta kelisý arqyly júzege asyrylyp keledi. Qylmystyq is júrgizý kodeksine engizilgen ózgeristerge sáıkes qolǵa alynǵan bul jańashyldyq eki jaq úshin de ońaı ári qolaıly. О́ıtkeni prosessýaldyq sheshimderdi elektrondy formatta kelisý kezinde tergeýshi men prokýrordyń ózara is-qımyly barynsha ońtaılandyrylǵan.

Sotqa deıingi ter­geý­diń biryńǵaı tiziliminiń jańa modý­lin tanystyrǵan elordalyq Sybaı­las jemqorlyqqa qarsy qyzmet depar­tamentiniń basshysy Shyńǵys Qabdýla zamanaýı sıfrly tehnologııalardy engizý jedel tergeý jumysynyń sapasyn art­tyryp qana qoımaı, ýaqyttan da uta­tynyn aıtyp ótti. Buryndary kúdiktige qatysty qandaı da bir aqparatty alý úshin, mysaly, onyń psıhıkalyq aýrý nemese nashaqor retinde esepte turǵan-turmaǵanyn anyqtaý úshin biraz ýaqytty óltirýge týra keletin. Al jańa júıege engizilgen bazada mundaı málimetterdiń barlyǵy tolyqtaı júktelgen.

Bul júıeniń ótken jyldyń 31 jeltoq­sa­nynan bastap iske asyrylyp kele jat­qanyn málimdegen Nur-Sultan qalasy pro­kýrorynyń orynbasary Eldos Qılym­janov jańa format engizilgeli beri kon­stıtýsııalyq quqyq buzýshylyq derek­teriniń birshama tómendegenin de aıtyp ótti. «Salystyrmaly túrde alyp qaraıtyn bolsaq, ótken jyldyń birinshi toqsanynda Nur-Sultan qalasyndaǵy quqyq qorǵaý organdarynda adam quqyn buzýǵa qatysty 20 derek anyqtalǵan bolsa, 2021 jyl bastalǵaly beri nebári 3 fak­ti anyqtalǵan. Al bıyl elordalyq Sybaı­las jemqorlyqqa qarsy qyzmet depar­tamentinde adam quqyn buzýǵa qatys­ty birde-bir derek tirkelmegen, birde-bir qylmystyq is qaıta tergeýge jol­danbaǵan. Bul – tergeý organdary men prokýratýranyń ózara tyǵyz qarym-qa­tynasta jumys istep jatqanyn ańǵartady. Al mundaǵy basty maqsat – adam quqyn buzbaý», deıdi E.Qılymjanov.

BAQ ókilderiniń suraqtaryna arnaıy jaýap bergen Sybaılas jemqorlyqqa qarsy is-qımyl agenttiginiń tóraǵasy Ma­rat Ahmetjanov qylmystyq prosestiń bul jańa formaty Memleket basshysynyń bıylǵy Joldaýynda quqyq qorǵaý organdarynyń aldyna qoıǵan jańa talabynan týyndap otyrǵanyn aıtyp ótti.

«Prezıdent quqyq qorǵaý orga­n­darynyń jumysy áli de burynǵysha aq pen qarany anyqtaýdan buryn, aıyptaýǵa jaqyn ekenin ashyq jetkizgen bolatyn. Sol sebepti de azamattardyń qylmystyq jaýapkershilikke esh negizsiz tartyl­ýyn boldyrtpaý úshin úsh býyndy model qurýdy tapsyrdy. Al biz qolǵa alyp otyrǵan tergeý organdary men prokýratýranyń onlaın formattaǵy jumys tásili azamattardyń quqyn zamanaýı turǵydan qorǵaýǵa múmkindik beredi», deıdi agenttik tóraǵasy. Ol úsh býyndy modeldi tolyqqandy engizý jumystaǵy birjaqty aıyptaý baǵytyn joıýǵa, tergeýshilerdiń is júrgizý kezinde jıi jiberetin qatelikterin boldyrmaýǵa jáne jazanyń bultartpastyǵy qaǵıdatyn saqtaýdy qamtamasyz etýge múmkindik beretinin de atap ótti.

Qylmystyq prosestiń jańa formaty quqyq qorǵaý organdarynyń ju­my­syndaǵy aıyptaý baǵytyn joıýǵa múm­kindik beretinine senim bildirgen M.Ah­met­janov: «Eń aldymen qylmys qura­my­nyń bar-joǵy aıqyndalady. Kúdik­tige qatysty dálelderdiń zańǵa sáıkes jáne tolyqqandy jınalýy qatań qa­da­ǵalanady. Tergeýshi osynyń barlyǵyn tal­dap, jan-jaqty qaraýy qajet. Bul – bi­rinshi súzgi. Úsh býyndy model júıe­sinde prokýror ol – ekinshi súzgi. Ol qyl­mystyq prosestiń ár satysyna qan­daı da bir baǵa berýde eshkimge táýeldi emes. Agenttik qyzmetkerleri jınaǵan bar­lyq materıaldardy elekten ótkizedi, jan-jaqty qarastyrady jáne kelisken jaǵdaıda rastaıdy. Tek osydan keıin ǵana prosessýaldyq sheshim zańdy kúshine enedi. Qazirdiń ózinde mundaı kelispeýshilik de­rekteri óte kóp. Mysaly, bir ǵana Nur-Sultan qalasynda prokýrorlar kelispegen jeti fakt bar. Bul mehanızmniń naqty jumys isteıtinin bildiredi. Al jańa format agenttiktiń tergeý organdaryn jaýapty bolýǵa ıtermeleıdi», deıdi.

Sonymen qatar M.Ahmetjanov Sy­baı­las jemqorlyqqa qarsy qyzmet salasynda jumys isteıtinderdiń nazaryn Qylmystyq is júr­­gizý kodeksiniń talaptaryn tolyqtaı saq­­tap, azamattardyń konstıtýsııalyq quqyq­ta­ry­n buzýǵa jol bermeý qajettigine aýdardy.

Agenttik qyzmetkerleri men proký­ror­lardyń elektrondy formatta proses­sýa­ldyq sheshimderdi kelisýdegi ózara is-qı­mylymen tanysqan Ǵızat Nurdáý­letov jumystyń jańa formatyna to­lyq kóshý kezinde kezdesetin tehnı­kalyq qatelikterdiń aldyn alýdy tapsyr­dy. Zańdylyqty qamtamasyz etý úshin en­gizilgen ózgeristerdiń basty erekshelik­terine toqtalǵan elimizdiń Bas prokýrory so­nymen qatar tergeý sapasyn arttyrý­ men jınalatyn materıaldardyń tolyqty­ǵyn qamtamasyz etý boıynsha jumysty odan ári jetildirýdiń mańyzdylyǵyn atap ótti.