Jylqyshy aýyldyń jaqsylyǵy

Mundaı salt-dástúrimizdi saqtaýda Qoshankól aýylynyń turǵyndary ózgelerge ónege bolyp keledi. Munda jylqy ustamaıtyn otbasy sırek kezdesedi. Sonyń bir kórinisindeı, aýdan ortalyǵynan Qoshankól aýylyna qaraı baratyn kúre joldyń boıynda tuıaǵymen jer tarpyǵan sáıgúliktiń qoladan soǵylǵan eskertkishi tur.

Qoshankól aýylynda jyl­qyǵa arnalǵan mýzeı de bar. Munda qasıetti túlikti sıpattaıtyn san túrli eksponattar men at ábzelderi, jylqyǵa qatysty mazmundy anyqtamalyqtar, ta­nymdyq materıaldar qo­ıylǵan. Mýzeıdegi jergilikti mú­sinshi sheberler soqqan at músini de erekshe kóz tartady. Qo­shankól aýyldyq okrýginiń ákimi Ernar Ilııasov mýzeıden oryn alǵan jádigerlerdiń bári aýyl azamattarynyń shyn janashyrlyq peıilderiniń arqasynda jınaqtalǵanyn aıtyp berdi. Sonymen birge ol aýylda at sportyna qatysty is-sharalar, qyz qýý, kókpar tartý, aýdaryspaq sekildi ulttyq oıyndar, taı, qunan, dónen jarystaryn ótkizý dástúrge aınalǵanyn jetkizdi.

– Elimizdiń ózge óńirlerinde jylqyǵa arnalǵan mýzeı bar-joǵyn dóp basyp aıta almaı turmyn. Eger bolmasa, onda bizdiń aýyldaǵy respýblıkadaǵy jalǵyz mýzeı bolyp shyǵady. Eń bastysy, aýylymyzda jyl­qynyń qadir-qasıetin uǵynatyn urpaq ósip keledi, – deıdi ol.

Aýyl turǵyndary tek mal ósirip, mal baǵyp qoımaı, sonymen birge buryn aınalysyp kórmegen tyń kásipterge de bet bura bastaǵan. Buǵan «Bastaý Bıznes» baǵdarlamasynyń sha­paǵaty tıipti. Atalǵan joba sheń­­berinde qoshankóldikter kólemi 500 myń teńge kóleminde qaı­tarymsyz nesıe alyp, paıdaly ispen shuǵyldana bastaǵan. Osy oraıda turǵyndar jańa kásiptiń álippesin ıgerý úshin «Atameken» kásipkerlik pala­tasynyń óńirlik ókildigi ja­nyndaǵy onkúndik onlaın kýrs­tan ótken.

Jańa kásipterdi ıgerý, ásirese turmysy tómen otbasylar úshin óte tıimdi ári yńǵaıly bolyp otyr eken. Shaǵyn nesıesin óteý úshin turǵyndardyń biri shaǵyn naýbaıhana ashsa, ekinshisi taýyq ósirýdi qolǵa alǵan.

Qoshankól – jylqyǵa ǵana emes, qoıǵa da baı aýyl. Sońǵy jyldary qoıdyń júnin qaıta jibererin bilmeı, dal bolǵandary da az emes. Keıin taǵy osy «Bas­taý Bıznestiń» kómegimen qoı júnin tútip, óńdeıtin shaǵyn apparat satyp alǵan.

Prezıdent Qasym-Jomart Toqaev belgilegen «Halyq únine qulaq asatyn Úkimet» jobasy negizinen elektrondy formatqa negizdelgeni málim. Mundaı ja­ńashyldyq pen qyzmet kórsetý úrdisi shalǵaıdaǵy Qoshankól aýyly­na da jetken. Aýyldaǵylar elektrondy qyzmet arqyly qajetti anyqtamalardy úıde otyryp-aq ala alady.

Qoshankól aýylynyń tur­ǵyndary óńirge súbeli úles qosqan azamattaryn da ardaqtaı biledi. О́mirden ótkenderine taǵzym etip, kózi tirilerine qur­met kórsetýdi dástúrge aı­nal­dyrǵan. Osy oraıda olar ótken ǵasyrdaǵy jetpisinshi jyl­dardyń aıaǵy men sekseninshi jyl­dardyń basynda Qoshankól sovhoznyń dırektory bolǵan Sá­­limgereı Asan­ǵalıevke es­kert­kish músin ornatypty.

– Keńestik kezeńdegi «qyzyl dırektordy» dáriptegeni qalaı deýi de múmkin, bireýler. Biraq qoshankóldikter úshin Sálimgereı aǵanyń orny bólek. Ol kisi shóp shabý, egin orý jáne mal ósirý sekildi tapsyrmanyń tasasynda qalyp qoımaı, eń birinshi kezekte aýyl turǵyndarynyń áleýmettik-turmystyq jaǵdaıyna erekshe den qoıǵan azamat. О́zi basqarǵan kezde aýylymyzdy oblystaǵy eń damyǵan, eń sáýletti sha­rýashylyqtyń birine aınaldyra bildi. Munda mádenıet úıi, bala­baqsha, qoǵamdyq monsha, orta mektep jáne ákimshilik ǵıma­rattar boı kóterdi. Sol úshin ózi múshesi bolyp tabylatyn kompartııadan quqaı kórip, qyzmetinen alyndy. Onyń esimin jerlesterimiz qashanda qurmet tutady. О́zi turǵyzǵan mádenıet úıiniń aldyna asyl azamatqa arnalǵan eskertkish qoıýymyzdyń máni osynda, – deıdi aýyl ákimi E.Ilııasov.

Aýyl turǵyndarynyń bo­ıyndaǵy taǵy bir jaqsy qasıet – óz aýylyn sheksiz súıip, onyń bir kádesine jaraýǵa árqaısysynyń ázir turatyny. О́zderi týyp-ósken topyraqty qadirlep, qashanda oǵan janashyrlyqpen qaraıtyn qoshankóldikterdiń bul jaqsy qasıeti ózge aýyl turǵyndaryna da sińisti bolsa ıgi.

Temir QUSAIYN,

jýrnalıst

Batys Qazaqstan oblysy,

Qaztalov aýdany,

Qoshankól aýyly