Kelesi aptada Birikken Arab Ámirlikteriniń Dýbaı qalasynda bokstan eresekter arasyndaǵy kezekti Azııa chempıonatynyń jalaýy jelbireıdi. Sary qurlyq dodasynda elimizdiń birinshi nómirli boksshylary judyryqtasatyny belgili boldy.
Ulttyq quramanyń bas bapkeri Ǵalym Kenjebaev Olımpıada aldyndaǵy sońǵy iri jarysta Tokıoda el namysyn qorǵaıtyn bylǵary qolǵap sheberlerin synaqtan ótkizip alýdy jón sanaǵan eken. Atap aıtar bolsaq, Dýbaı sharshy alańdarynda Qazaqstan quramasynan byltyrǵy Qazaqstan chempıondary Danııal Sábıt (49 kg) pen Sabyrhan Mahmud (56 kg) jáne Olımpıada joldamasynyń ıegerleri Sáken Bıbosynov (52 kg), Serik Temirjanov (60 kg), Zákir Safıýllın (64 kg), Abylaıhan Júsipov (69 kg), Ábilhan Amanqul (75 kg), Bekzat Nurdáýletov (81 kg), Vasılıı Levıt (91 kg), Qamshybek Qońqabaev (+91 kg) óner kórsetedi.
2019 jyly Taılandta ótken Azııa birinshiliginde Qazaqstan quramasy eki altyn, eki kúmis, úsh qola medal jeńip alǵan bolatyn.