Kásipqoı bokstaǵy Qazaqstannyń shoqjuldyzy Gennadıı Golovkın eń keıingi jekpe-jegin ótkizgenine jarty jyldan astam ýaqyt ótse de, áli kúnge deıin sharshy alańǵa shyǵýǵa asyǵar emes. Otandasymyzdyń elimizden bólek, álemniń túkpir-túkpirindegi jankúıerleri onyń kelesi aıqasyn taǵatsyzdana kútip júrgeni jasyryn emes. Al Gennadıımen bir ýaqytta jekpe-jek ótkizgen jerlesimizdiń áıgili qarsylasy meksıkalyq Saýl Alvares bolsa, osy aralyqta bir emes, eki márte jankúıerlerin qýantyp úlgerdi.
Negizi, eki boksshynyń jekpe-jek ótkizý ýaqyty kerisinshe bolýy kerek edi. Sebebi bıyl ǵana 31 jasqa tolǵan Alvarestiń kásipqoı boks áleminde keminde 5-6 jyl júretin múmkindigi bar jáne soǵan sáıkes qazir asyǵystyq tanytpasa da, birtalaı jekpe-jek ótkizip úlgeredi. Al Golovkın bolsa, áne-mine degenshe qolǵabyn shegege ilýge daıyn tur. Jerlesimiz sáýir aıynda 39 jasyn toılaǵany barshaǵa belgili. Sondyqtan endi qalǵan 1-2 jyldyń ishinde sharshy alańda jıi boı kórsetip, múmkindiginshe aty álemge áıgili boksshylarmen judyryqtasyp, óz myqtylyǵyn dáleldeýi kerek.
Onyń ústine, Golovkın 2019 jyldyń naýryzynda DAZN strımıngtik platformasymen úsh jylǵa alty jekpe-jek uıymdastyrýǵa kelisken bolatyn. Iаǵnı kelisim boıynsha jyl saıyn eki kezdesý ótkizýge mindetti. Otandasymyz alǵashqy jyly jospardaǵy eki jekpe-jegin kanadalyq Stıv Rolls pen ýkraınalyq Sergeı Derevıanchenkomen ótkizse, byltyr pandemııaǵa baılanysty bir-aq ret sharshy alańǵa shyqty. Esterińizde bolsa, jeltoqsan aıynda polshalyq Kamıl Sheremetamen qolǵap túıistirip, 7-raýndta tehnıkalyq nokaýtpen jeńiske jetken edi. Sondaı-aq orta salmaqtaǵy IBF tujyrymynyń belbeýin birinshi márte sátti qorǵaǵan-dy.
Merzimi bıyl aıaqtalatyn kelisimniń áli ótkizilmegen úsh kezdesýi bar. Keıbir sheteldik BAQ ókilderiniń málimeti boıynsha, Sheremetamen ótken kezdesý joǵarydaǵy kelisimshart aıasynan tys uıymdastyrylǵan jáne 2020 jyly kezdesý bolmady dep sanap, DAZN kelisimdi taǵy bir jylǵa sozǵan. Esesine strımıngtik arnanyń úsh jylda alty aıqas ótkizgeni úshin Golovkınge tóleıtin áýeldegi 100 mıllıon dollar aqshasy da azaıǵan.
Otandasymyzdyń ekinshi promoýteri jáne DAZN strımıngtik platformasynyń basshysy Eddı Hırn bir suhbatynda Golovkınge bıyl eki jekpe-jek uıymdastyryp berýdi josparlap jatqanyn málimdedi. Biraq naqty qaı boksshylarmen kelissóz júrgizip jatqanyn ashyp aıtpady. Aldyn ala málimetter boıynsha jerlesimiz aldaǵy tamyzda 2012 jylǵy London Olımpıadasynyń júldegeri, IBF reıtınginde 5-orynda turǵan brazılııalyq Eskıve Falkaomen (28-0, 20 KO) kezdesip, IBF beldigin qorǵaýy múmkin. Al jeltoqsanda orta salmaqtaǵy WBA tujyrymy boıynsha sýperchempıon beldiginiń ıegeri 35 jastaǵy japonııalyq Reta Mýratamen (16-2, 13 KO) IBF pen WBA belbeýin sarapqa salmaq.
Demek Golovkınniń bıyl Alvarespen úshinshi márte jekpe-jek ótkizý jospary joq sııaqty. Sondaı-aq «Kanelo» da trılogııaǵa asa qulshynyp turmaǵan syńaıly. Sondersti jeńgennen keıin meksıkalyq «sary bala» jýrnalısterge bergen suhbatynda Golovkın ekinshi orta salmaqqa kóteriletin bolsa ǵana úshinshi aıqasqa kelisim beremin dedi.
Jalpy, dúnıe júziniń boks jankúıerleri tarapynan Golovkın-Alvares arasyndaǵy úshinshi aıqasqa suranys áli de azaıǵan joq. Degenmen ýaqyt ótken saıyn eki alyptyń arasyndaǵy kezdesý ótpeıtini aıqyndalyp kele jatsa da, kóp boks jankúıerin eki boksshynyń jekpe-jekterin kórsetý quqyǵy bir arnaǵa, ıaǵnı DAZN strımıngtik platformasyna tıesili jáne onyń basshysy Eddı Hırn bolǵandyqtan, úmitterin úzbeı keledi. Trılogııadan táp-táýir qarjyǵa keneletinin biletin Hırn, bálkim bul kezdesýdi kelesi jyly Golovkınniń kásipqoı bokstaǵy qoshtasý jekpe-jegi retinde uıymdastyryp berýdi kózdep otyrǵan shyǵar.