Almaty oblysynda mektep jasyna deıingi baldyrǵandardy balabaqshamen qamtý qarqyn aldy. Búginde aımaqtaǵy 3 pen 6 jas aralyǵyndaǵy balalardyń mektepke deıingi bilimmen qamtylýy 98 paıyzǵa jetken. Iаǵnı óńirdegi 99 318 baldyrǵan alǵashqy bilim men tárbıe satysynan ótý múmkindigine ıe bolyp otyr.
Al Jetisýdaǵy 1 236 mektepke deıingi bilim men tárbıe berý mekemesiniń 184 nysany – memlekettik balabaqsha bolsa, 717 balabaqsha jekemenshik eken. Jáne jeke ınvestorlar ashqan 335 shaǵyn ortalyq bar. Jalpy, jeke kásipkerler ashqan balabaqshalardyń úlesi 58,2 paıyzdy qurap otyr. Balabaqshaǵa degen suranys oblystyń Almaty qalasymen shektesetin aýdandarynda joǵary. Bul túsinikti de, óıtkeni turǵyndardyń deni megapolıske qatynap jumys isteıtin aýyldarda balany mektepke deıingi tárbıe berý oryndaryna berý dástúrge aınalǵan. Osy zańdylyq Ile aýdanynyń aýmaǵyna da tán. Qazir aýdanda balalardy mektepke deıingi bilim berý oryndarymen qamtýdy 100 paıyzǵa jetkizý úshin jumys istelip jatyr. Búginde bul kórsetkish 97,5 paıyzdy quraıdy. Al aýdan boıynsha mektepke deıingi uıymdarda 1 myń 388 tárbıeshi eńbek etetin kórinedi.
Joǵaryda mektepke deıingi bilim men tárbıe beretin oryndardy ashýǵa jeke kásipkerler muryndyq bolyp otyrǵanyn aıttyq. Qazir qalaǵa jaqyn aýyldarda kóptegen jekemenshik balabaqsha jumys istep tur. Jańadan ashylyp jatqandary da jetkilikti. Sonyń biri jaqynda iske qosylǵan «Aısultan-1» bóbekjaı balabaqshasy. 100 balaǵa arnalǵan ortalyq Qoıanqus aýylynda ornalasqan. «Aısultan-1» bóbekjaı-balabaqshasynyń jańadan boı kóterýine kásipker Qaırat Qulseıitov atsalysqan eken. Jıyrma bes jylǵa jýyq bıznes salasynda tabysty eńbek etken ol endi aýyl balalarynyń bilim alyp, tárbıeli bolýyna úles qosýdy maqsat etip otyr. Balabaqshada otyzǵa jýyq tálimger, tárbıeshi, jumysshy eńbek etetin bolady. Iаǵnı aýyl turǵyndaryna jumys ta tabyldy.
– Balabaqsha 100 balaǵa arnalǵan tósektik jabdyqpen tolyq qamtyldy. 30 adamǵa jumys oryny ashyldy. Osynyń bárin óz qarajatymyzben istep, balabaqshany talapqa saı etip saldyq. Ǵımarattyń irgetasynan bastap normatıvtik quqyqtyq aktilerde belgilengen sanıtarlyq-epıdemııalyq talaptardyń saqtalýyn qatań qadaǵaladyq. О́ıtkeni balalar keń de jaryq ári qaýipsiz ǵımaratta óner úırenip, tárbıe alýy kerek, – deıdi kásipker Qaırat Qulseıitov.
Sondaı-aq balabaqshanyń oıyn bólmesi ulttyq naqyshta bezendirilgen eken. Ondaǵy qazaqy órnekter, shańyraq sımvoly ulttyń mádenıeti men dástúrin pash etip, óskeleń urpaq sanasyna ultjandylyqty jastaıynan sińirýge negiz bolady degen senim bar.
– Qazir jeke kásipkerlerdiń balabaqsha, damytý ortalyqtaryn ashýǵa yntasy joǵary. Bul baǵyttaǵy kózqaras burnaǵyǵa qaraǵanda túbegeıli ózgerdi. О́ıtkeni kásipkerler bul iste tek paıdany ǵana oılamaı, memleket pen halyq aldyndaǵy jaýapkershilikti sezinip keledi. Ǵımarattardyń talapqa saı bolýynan bastap tálimgerler men tárbıeshilerdiń bilimi men biliktiligine degen suranys artty. Bul, árıne, básekeniń arqasy. Úzdik, ozyq balabaqshaǵa degen tańdaý joǵary. Ekinshi jaǵynan balalardy mektepke deıingi bilim berý oryndarymen qamtý mindeti oryndalyp jatyr. Bizdiń aýdanda bul másele 100 paıyz sheshiledi. Qazirdiń ózinde kórsetkish 97,5 paıyzdy quraıdy. Oǵan memleket te, jeke bıznes te múddeli, – deıdi Ile aýdany bilim bóliminiń basshysy Lázzat Kátkeeva.