Meniń negizgi mamandyǵym, kásibim – adam balasynyń minezin zertteý. Árkimniń minezi ár isinde izin qaldyratyny ǵylymı turǵydan tolyq dáleldengen. Sol sebepti, men óz zertteýimniń áýel basynan eń aldymen Qasym Amanjolovtyń Semeıdegi, Oraldaǵy, Almatydaǵy ortasyn anyqtap alýdy uıǵardym.
Bıyl qańtarda Oralda arhıvte bolyp, Qasymnyń 1933-1936 jylǵy tirshiliginen biraz derek taptym. Al bıyl naýryzdyń sońǵy úsh kúninde Almaty qalasynda Qasym Amanjolovtyń 1931 jyly «Qyzyl ásker» gazetinde ádebıet qyzmetshisi bolyp qyzmet etkendigin dáleldeıtin derekke jolyqtym.
«Qyzyl ásker» gazeti 1929-1936 jyldary sol kezdegi Qazaqstan soǵys komıssarıatynyń, ólkelik OSAVIAHIM keńesiniń, «Eńbekshi qazaq» basqarmasynyń jetilik gazeti retinde shyǵyp turǵan. О́zińizge belgili, «Egemen Qazaqstan» gazetiniń arǵy tarıhy «Eńbekshi qazaq» basylynan bastaý alǵandyqtan Qasym aqyndy da «egemendikterge» jatqyzýǵa zańdy negiz bar dep oılaımyn. Qasym Oral qalasynda da, Almatydan kelip «Ekpindi qurylys» gazetinde jýrnalıst bolyp qyzmet etken. Sonymen Qasym aqyn ǵana emes, sonymen qatar gazetterde qyzmet atqarǵan kásibı jýrnalıst. Aldaǵy ýaqytta, qudaı qalasa, Semeı qalasyna jol tartpaqpyn. О́ıtkeni Qasym 1922 jyly Qarqaralydan «Qyzyl kerýenge» erip Semeıge keldi de, shamamen 1930 jyldyń mamyrynda Almatyǵa attanǵan ǵoı. Men, Qasymnyń Semeıdegi segiz jyldyq ortasy ot júrekti aqynnyń syr sandyǵyn tolyq ashyp bererine kámil senemin.
Al tómende oqyrman nazaryna Qasym Amanjolovtyń «Qyzyl ásker» gazetinde qyzmet istegen kezeńinde túsirilgen sýretti usynyp otyrmyn.
«Qyzyl ásker» gazetiniń redaksııa quramy: jaýapty redaktor Kárim Abdrahmanov; jaýapty hatshysy Sary Qazbekuly; ádebıet qyzmetshisi Ahmet Abdoldauly; ádebıet qyzmetshisi Qasym Amanjoluly.
Marat AZBANBAEV
Qaraǵandy