16 jáne 18 mamyr kúnderi elordalyq teatrdyń Úlken zaly sahnasynda Reseıdiń Halyq ártisi, «Astana Opera» balet trýppasynyń kórkemdik jetekshisi Altynaı Asylmuratovanyń Gala-baletteriniń eksklıýzıvti, san alýan avtorlyq baǵdarlamalary ótedi. Kórermen qaýym daryndy ártisterdiń birqatar aıtýly debıýtimen jarqyn nómirin tamashalap, laıyqty baǵasyn bere alady.
Osylaısha, balet trýppasynyń solısi, áıgili IBBC syılyǵynyń laýreaty Daler Zaparov HH ǵasyrdyń ańyzǵa aınalǵan baletmeısteri R.Petıdiń horeografııasyndaǵy J.Bızeniń mýzykasyna «Karmen» baletinen dýette sahna tórine alǵash ret shyǵady. Osy keshte onyń sahnadaǵy áriptesi Qazaqstannyń eńbek sińirgen qaıratkeri Gaýhar Ýsına bolmaq. Eske salar bolsaq, ataqty horeograf Rolan Petı osynaý dýetti óziniń jubaıy, tanymal balerına Zızı Janmerge arnap qoıǵan. Nómirdiń negizgi taqyryby – jalyn atqan Karmen men erjúrek Don Hozeniń qushtarlyqqa toly mahabbaty.
Anastasııa Zaklınskaıanyń debıýti baǵdarlamanyń taǵy bir jańalyǵy bolmaq. «Astana Operanyń» solısi, A.Iа.Vaganova atyndaǵy Orys balet akalemııasynyń 2013 jylǵy túlegi F.Shopenniń mýzykasyna qoıylǵan M.Fokınniń «Shopenıana» baletinen ataqty Jetinshi valste alǵash ret óner kórsetedi. Oǵan kóp jyldar boıy Bavarııa ulttyq teatrynda eńbek etken halyqaralyq baıqaýlardyń laýreaty Oljas Tarlanov jup bolady.
О́tken ǵasyrdyń basynda Parıjde usynylǵan «Shopenıana» baleti – romantı-
kalyq taqyrypqa ásem stıldeý, biraq Shopenniń dál osy jetinshi valsi gala baǵdarlamaǵa tutastaı jarqyn jeńildik berip, kórermendi M.Petıpanyń horeografııasyndaǵy L.Mınkýstyń «Baıaderka» baletinen kóleńkeler kórinisi usynylatyn ekinshi bólimge aqyryndap jeteleıdi.
Ony Qazaqstannyń eńbek sińirgen qaıratkerleri, teatr prımasy men premeri Áıgerim Beketaeva men Baqtııar Adamjan balet ártisterimen birge oryndaıdy. «Baıaderkadaǵy» kóleńkeler kórinisin «balettegi balet» dep te ataıdy. Bul bıdiń qımylǵa toly aıryqsha áseri árdaıym kórermenniń qoshemetin týdyrady: balerıanalardyń naqty ári aıqyn tizbektelgen qatary, qımyl qozǵalystarynyń úılesimdigi eshkimdi beıjaı qaldyrmaıdy.
Sahna tórinde Qazaqstannyń eńbek sińirgen qaıratkeri Ánel Rústemova, Qazaqstannyń eńbek sińirgen qaıratkeri Erkin Rahmatýllaev, Arman Ýrazov, Shuǵyla Ádephan, Adelına Tólepova, Jánibek Ahmedıev, Nu-raı Nursafına, Dıas Qurmanǵazy, Janserik Ahmetov, Nazıra Zaetova, Qýat Káribaev jáne basqalar klassıkalyq, neoklassıkalyq jáne zamanaýı qoıylymdardyń san alýan úzindilerinen turatyn naǵyz otshashý jasaıdy.
«Egemen-aqparat»