Jambyl oblysynyń ákimi Berdibek Saparbaevtyń tóraǵalyǵymen ótken kezekti otyrysta aımaqtaǵy epızootııalyq jaǵdaı talqylandy, dep habarlaıdy Egemen.kz.
Osy oraıda oblystyq veterınarııa basqarmasynyń basshysy Erbol Jıenqulov óńirlerde mal aýrýlary boıynsha ahýal turaqty ekenin jetkizdi. Jospar boıynsha barlyq aýdanda epızootııaǵa qarsy sharalar júrgizilip jatyr.
«Brýsellezben kúres júıeli túrde júrgizilip jatyr. Eger ınfeksııa zerthanada rastalatyn bolsa, onda ol aýmaqqa shuǵyl tekserý júrgizilip, epızootııalyq oshaqtyń shekaralary aıqyndalady. Osylaısha, aýrýdyń taralýyna jol berilmeıdi. Aýrý janýarlar sanıtarlyq soıýǵa jiberiledi», deıdi spıker.
Aýyl sharýashylyǵy mınıstrligi veterınarııalyq baqylaý jáne qadaǵalaý komıtetiniń óńirlik ınspeksııasynyń basshysy Jandar Kókeev oblys boıynsha 234391 bas iri qara jáne 1 154 816 bas usaq mal tekserilgenin aıtty. Aǵymdaǵy jyldyń tórt aıynda 11 jambyldyq turǵyn brýsellez juqtyrsa, bul ótken jylmen salystyrǵanda bes adamǵa az.
Oblys ákimi mal ósirýshilerge ýaqtyly veterınarııalyq kómek kórsetýdi, mal aýrýlarynyń aldyn alý jáne dıagnostıkalaý jumystaryn der kezinde júrgizýdi tapsyrdy.