Qasym-Jomart Toqaev Nur-Sultan qalasyna jumys saparymen kelgen Fınlıandııanyń Syrtqy saýda jáne halyqaralyq damýdy qoldaý mınıstri, Saýda-ekonomıkalyq yntymaqtastyq jónindegi úkimetaralyq komıssııanyń teń tóraǵasy Vılle Skınnarıdi qabyldady, dep habarlaıdy Egemen.kz Aqordaǵa silteme jasap.
Memleket basshysy mınıstrge iltıpat bildirip, Qazaqstannyń syrtqy saıasatynda Sýomıdiń mańyzdy ról atqaratynyn atap ótti.
– Fınlıandııa Soltústik Eýropa elderi arasyndaǵy Qazaqstannyń eń iri ınvestory. Biz dostas eki eldiń belsendi ári jan-jaqty yntymaqtastyǵyn joǵary baǵalaımyz, – dedi Prezıdent.
Memleket basshysy joǵary deńgeıdegi turaqty saıası dıalogty qoldaý qajet ekenine nazar aýdardy. Qasym-Jomart Toqaev Fınlıandııa Prezıdenti Saýlı Nıınıstıoge júrekjardy sálemin joldap, ony Qazaqstanǵa resmı saparmen kelýge shaqyrdy.
Vılle Skınnarı Qasym-Jomart Toqaevqa kezdesýge múmkindik jasaǵany úshin alǵys aıtyp, pandemııa bastalǵannan bergi alǵashqy resmı saparyn Qazaqstannan bastaǵanyn atap ótti.
Ol Memleket basshysyna Fınlıandııa Prezıdentiniń sálemin jetkizdi.
– Bizdiń elderimiz arasyndaǵy ekijaqty qarym-qatynas óte jaqsy. Fınlıandııanyń táýelsizdik alǵanyna 100 jyldan asty, al Qazaqstanǵa – 30 jyl. Pandemııa aıaqtalǵannan keıin ekijaqty baılanystardy damytýdyń jańa kezeńi bastalatynyna senimdimiz. Saıası dıalogty tereńdetýde Qazaqstan men Fınlıandııanyń áleýeti zor. Ásirese, ózara saýda-sattyqty damytý jáne ınvestısııa tartý mańyzdy, – dedi Fınlıandııa mınıstri.
Qasym-Jomart Toqaev birlesken jobalardy júzege asyrýda, ásirese, jasyl tehnologııalar men telekommýnıkasııa salalaryna basymdyq beriletinin jetkizdi.
Prezıdent sheteldik ınvestorlar men fın tehnologııasyn transfertteýge bizdiń elimizdiń erekshe jeńildikter jasaýǵa daıyn ekenin atap ótti.
Vılle Skınnarı Eýropalyq odaq aıasyndaǵy yqpaldastyqtyń perspektıvalary jaqsy ekenin jetkizip, klımattyń ózgerýine qarsy kúreste qabyldanyp jatqan sharalardy jáne ekologııalyq máselelerdi sheshý, aýyl sharýashylyǵy, azyq-túlik sektoryn damytý, sıfrlandyrý, kıberqaýipsizdik jónindegi josparlardy qoldaıtynyn aıtty. Fın tarapy atalǵan salalar boıynsha yqpaldastyq ornatýǵa daıyn.
Osy oraıda saýda-ekonomıkalyq yntymaqtastyq jónindegi úkimetaralyq komıssııanyń jáne onyń energetıka, kólik, aýyl sharýashylyǵy, bilim salalary boıynsha tórt jumys tobynyń qyzmetin jandandyrý mańyzdy ekeni atap ótildi.
Áńgimelesý barysynda óńirlik kún tártibindegi ózekti máseleler qozǵaldy. Atap aıtqanda resmı kómek kórsetýdi damytý aıasyndaǵy kooperasııanyń, sondaı-aq, Ortalyq Azııanyń ekologııalyq máselelerin sheshýdiń jáne Aýǵanstandaǵy qaýipsizdik pen turaqtylyqty kúsheıtýdiń áleýeti mol ekeni aıtyldy.