Búginde elordanyń monıtorıngtik toptary kásipkerlik nysandar arasynda shekteý jáne karantın sharalaryn buzýshylardy anyqtaýda. Jyl basynan beri 561 jeke jáne zańdy tulǵa ákimshilik jaýapkershilikke tartyldy, dep habarlaıdy Egemen.kz qala ákimdiginiń resmı saıtyna silteme jasap.
2021 jyldyń 1 qańtarynan 13 mamyryna deıin aýdandyq sanıtarııalyq-epıdemıologııalyq baqylaý basqarmalary shekteý jáne karantın sharalaryn buzǵany úshin jalpy somasy 118 728 975 teńgege 561 jeke, zańdy tulǵany ákimshilik jaýapkershilikke tartty.
Sonymen qatar shekteý jáne karantın sharalaryn buzǵany úshin birneshe ret ákimshilik jaýapkershilikke tartylǵanyna qaramastan tıisti talaptardy oryndamaǵan 47 kásipkerlik sýbektisine qatysty Nur-Sultan qalasynyń mamandandyrylǵan aýdanaralyq ákimshilik sotyna 52 materıal jiberildi.
Sot barlyǵy 36 nysannyń qyzmetin toqtatty jáne 6 mln teńgeden astam somaǵa ákimshilik aıyppul saldy.
13 mamyr kúni elordanyń monıtorıngtik toptary qalanyń kásipkerlik nysandarynyń karantındik jáne shekteý sharalary buzylýynyń tórt faktisin anyqtady.
Saryarqa aýdanynda «Dastarhan» kafesi men «Týrandot» meıramhanasy sanıtarlyq normalardy saqtamaǵan. Oryn sany boıynsha shekteýlerge qaramastan, mekemelerdiń birinde bir ýaqytta 75 adam, ekinshisinde – 67 adam bolǵan.
Baıqońyr aýdanynda karantın rejımin buzǵany úshin ákimshilik jaýapkershilikke «Gastro bar» kafesi tartyldy.
Almaty aýdanynda shekteý sharalaryn saqtamaýdyń 1 faktisi tirkelip, «Sultani MIX» kafesi belgilengen jumys rejımin buzǵan.
Jınalǵan materıaldyń bári sanıtarlyq-epıdemıologııalyq baqylaý basqarmasyna quqyq buzýshylarǵa qatysty tıisti sharalar qabyldaý úshin tapsyryldy.
Esterińizge sala keteıik, Nur-Sultan eki aıdan beri epıdemıologııalyq ahýaldy baǵalaý matrısasy boıynsha «qyzyl» aımaqta tur. Qaladaǵy epıdemıologııalyq jaǵdaı áli de turaqsyz bolyp otyr. Qala turǵyndary men qonaqtary, sondaı-aq kásipkerlik nysadary ózderin jáne jaqyndaryn qorǵaý úshin sanıtarlyq normalar men talaptardy qatań saqtaýy tıis.