Búgin Oral qalasynda qaıǵyly jaıt boldy. Polısııa basqarmasynyń qyzmetkeri Merjan Bısenǵalıev Tasqala aýdany Aınabulaq aýyly tusynda óziniń Chevrolet Cobalt avtokóligimen aýdarylyp qaldy. Bul týraly BQO Polısııa departamentiniń resmı ókili Bolatbek Belgibekov málim etti, dep habarlaıdy Egemen.kz
Belgili bolǵandaı, ol kólikte jalǵyz bolǵan. Aýyr jaraqaty saldarynan oqıǵa ornynda qaıtys boldy. Osy derek Tasqala aýdandyq polısııa bóliminde sotqa deıingi tergep-tekserýdiń biryńǵaı tizilimine tirkelip, QR QK 345-baby 3-bólimine sáıkes tergeý amaldary júrgizilip jatyr.
«Marqumnyń sońynda jary, kishkentaı qyzy qaldy. Merjan ishki ister organdaryna 2002 jyly ornalasyp, qyzmet babynda ózin jaqsy qyrynan kórsetti. Jaýapty da saýatty qyzmetkerlerdiń biri edi, árdaıym jastarǵa úlgi bola bildi», dedi Bolatbek Belgibekov.