Búgin Elordada «Taza Alem-2021» jobasy ekologııalyq senbilikten bastaldy. Senbilik aıasynda Qorǵaljyn tas joly boıyna kóshetter egildi, dep habarlaıdy Egemen.kz.
TazaAlem mádenı-buqaralyq jobasy Nur-Sultan ákimdigi men ákimdiktiń «Astana jastary» KMM bastamasymen qurylǵan.
«Biz bıyl TazaAlem jobasy aıasynda muqtaj adamdarǵa, zeınetkerlerge, ardagerlerge jáne tyl eńbekkerlerine kómektesýdi josparlap otyrmyz. Qysta aýlalardy qardan tazalap, jazda jóndeý jumystaryna kómektesemiz. Bylaısha aıtqanda, volonterlikpen aınalysamyz. Biz sondaı-aq shetelde keń taraǵan senbiliktiń erekshe formaty – ploggıngti engizdik. Ony «sport pen senbilik» degen sóz tirkesimen sıpattaýǵa bolady. Osyndaı formattyń arqasynda ádettegi qoqys jınaýdy komandalar jarysyna aınaldyramyz. Mysaly, qoqysty kim kóp jáne jyldam jınaıdy dep saıysýǵa bolady», dedi «Astana Jastary» KMM basshysynyń orynbasary Aıan Ermentaev.
Onyń aıtýynsha, jańa formattaǵy senbilikterge elordalyq úkimettik emes uıymdardyń ókilderin, oqýshylardy, stýdentter men Elorda turǵyndaryn da tartý josparlanyp otyr. Senbilik ótkiziletin aýmaq aǵash sanyna baılanysty tańdalady. Eger olar az bolsa, aýdan ákimdigimen kelise otyryp, aýmaqqa aǵash egiledi.
Uıymdastyrýshylardyń aıtýynsha, 1000-nan astam kóshet otyrǵyzý josparlanyp otyr.
Eske sala keteıik, elordanyń barlyq aýdanynda «Birge — Taza Qazaqstan» ekologııalyq aılyǵy ótip jatyr. Memleket basshysynyń tapsyrmasy boıynsha ákimdik saıabaq aýmaqtaryn, turǵyn úı alaptary men aýlalardy ǵana emes, qalanyń kórikti jerlerin de jappaı kógaldandyrady. Qalany jappaı kógaldandyrý ekologııany jaqsartyp qana qoımaı, qala turǵyndary serýendeıtin oryn qurýǵa, sonymen qatar qalanyń klımattyq jaǵdaıyn jaqsartýǵa múmkindik beredi.