Qostanaı oblysyna qarasty Áýlıekól aýdandyq órt sóndirý bóliminiń ǵımaratynda azamattyq qorǵanys ardageri, ishki qyzmet podpolkovnıgi Qaıyrbek Qabıevke memorıaldyq taqta ornatyldy.
Eskertkish taqtanyń ashylý rásimine jergilikti memlekettik organdardyń, tótenshe jaǵdaı departamentiniń jáne aýdandyq órtke qarsy kúres qyzmetiniń basshylary, ardager órt sóndirýshiniń týystary men aýyl turǵyndary qatysty. Memorıaldyq taqtany aýdan ákimi Erlan Temenov pen Qostanaı oblysy TJD ardagerler keńesiniń tóraǵasy Aleksandr Melnıkov ashty.
Saltanatty sharada aýdandyq máslıhat hatshysy Dáýlet Qoıshybaev quttyqtaý sóz sóılep, jınalǵan kópshilikke ózgeniń ómiri úshin talaı márte otqa kirip, batyrlyqtyń úlgisin kórsetken dańqty órt sóndirýshiniń eńbek joly týraly baıandap berdi.
– Qaıyrbek Qabıev ózine júktelgen mindetti adal oryndaǵan ójet órt sóndirýshi, bilikti maman edi. Onyń syndarly sátte qyzyl jalynnyń arasynan talaı adamdy aman alyp shyqqan kózsiz batyrlyǵyn búgingi óskeleń urpaqqa ónege etýimiz kerek. О́z isine berilgen, qysyltaıań kezde ábjil qımyldaıtyn sheber órt sóndirýshiniń eńbegi elenip, kezinde joǵary marapattarǵa ıe boldy. Endi, mine, búgin batyrǵa keıingi býyn áriptesteri laıyqty qurmet kórsetip, eskertkish taqta ornatyp jatyr. Bul kún erlik eskerilip, batyrlyq baǵalanǵan kún retinde el esinde saqtalady, – dedi Dáýlet Qoıshybaev.
Eńbek jolyn órt kúzetiniń ınspektory bolyp bastaǵan Qaıyrbek Qabıev tótenshe jaǵdaı qyzmeti salasynda uzaq jyl qatardaǵy órt sóndirýshi bolyp qyzmet atqardy. Keıin basshylyq qyzmetke aýysyp, Áýlıekól, Qusmuryn aýyldarynda jáne Amanqaraǵaı beketinde órt sóndirý bólimshelerin jasaqtady.
Qostanaı oblysy