Úkimet otyrysynda Premer-Mınıstr Asqar Mamın Nur-Sultan, Almaty, Shymkent qalalary men Qyzylorda, Mańǵystaý oblystaryndaǵy debıtorlyq bereshektiń ósip jatqany týraly aıtty, dep habarlaıdy Egemen.kz.
Búgingi Úkimet otyrysynda ótken jylytý maýsymynyń qorytyndysy men kelesi maýsymǵa daıyndyq sharalary talqylandy. Premer-Mınıstr ótken jylytý maýsymy qalypty rejımde bolǵanyn atap, aldaǵy maýsymǵa sapaly daıyndyqty qazirden bastaý kerektigin eskertti.
«1 maýsymǵa deıin Turǵyn úı-kommýnaldyq sharýashylyq, turǵyn úı jáne áleýmettik sala obektilerin daıyndaý boıynsha is-sharalar josparlaryn bekitýdi tapsyramyn. Soltústik jáne shyǵys óńirleriniń aýa raıy jaǵdaılaryn eskere otyryp, 1 qyrkúıekke deıin – bilim berý uıymdarynyń, 15 qazanǵa deıin barlyq ınjenerlik ınfraqurylymnyń, turǵyn úı-kommýnaldyq sharýashylyq, turǵyn úı jáne áleýmettik sala obektileriniń tolyǵymen daıyn bolýyn qamtamasyz etý qajet», dedi Premer-Mınıstr.
Sondaı-aq jaýapty sala basshylaryna tutynýshylardyń debıtorlyq bereshegin tómendetý jáne energııa óndiretin uıymdardyń otyn jetkizýshilerdiń aldyndaǵy bereshegin óteý boıynsha sharalar qabyldaýdy júktedi.
«Ásirese, Nur-Sultan, Almaty, Shymkent qalalary men Qyzylorda, Mańǵystaý oblystarynyń ákimdikteri debıtorlyq bereshektiń ósý problemasyna nazar aýdarsyn», dedi Asqar Mamın.