BARYMYZDY BAǴALAI BILEIIK

“Egemen Qazaqstan” gazetiniń bıylǵy 27 qańtardaǵy sanynan “Uıat boldy-aý...” atty maqalany oqyp oıǵa qaldym. Jýrnalıst Ǵalym Qojabekovtiń osy ma­te­rıalda Qajymuqan Muńaıt­pasuly týraly kótergen máselesi ózekti jaıdy qozǵap, ótkir jazylǵan eken. Avtor aıtqandaı, biz shy­nymen de birtýar tulǵamyzdyń qadirin óziniń týǵan jerinde áli bilmeı júrgen sekildimiz. Má­selen, sol Qajy­muqanymyz orys­tyń Poddýb­nyıynan kem boldy ma?! Estip te, oqyp ta, kórip te júr­miz, Reseıde Poddýbnyı de­ge­nińiz ulttyq batyr retinde qur­met­teledi. Al bizde dańq­ty chem­pıo­nymyzdyń dál Astananyń túbin­degi týǵan aýy­lynda shynymen de: “Mine, bizdiń ataqty balýanymyz týǵan aýyl osy”, dep kórsetetin eshteńe joq-aý. Osy oraıda eskertkishin somdap, murajaıyn myqtap salǵan Ońtústik Qazaqstan oblysynyń azamattaryna rıza­shylyq tany­typ, qudaıǵa shúkir deýimiz kerek. Men Qajekeń týǵan aýyldyń turǵynymyn. Iá, kezinde bul eldi meken Býdennyı atanǵan edi. Ol kezde, árıne, týralap aıtqanda 1957 jylǵa deıin “kúdiktiler tizimine” ilingenderdiń esimin ataýdyń ózi qylmystaı bolatyn. Bizdiń Qajekeńniń ómirbaıanyna úńiler bolsaq, ol kisi de sol zamannyń qııanatyn kórgenderdiń biri. Bul jóninde aldyńǵy býyn azamattary jaqsy biledi dep oılaımyn. Degenmen, búgingi Qajymuqan aýylynda jaǵdaı tym jaman dep aıta almaımyz. Aýylymyzdyń týmasy marqum Murat Kereıbaev kózi tirisinde “Bala Muqan, balýan Muqan, qajy Muqan” jáne Qajymuqan” atty derekti kitaptar shyǵardy. Ol kisi osy aýylda murajaı ashamyn dep biraz tal­pynyp edi, biraq oǵan jetpeı ketti. Mekteptegi deneshynyqtyrý muǵalimi Asylbek Zamzın qazaq kúresi seksııasyn ashyp, qazir munda kóptegen bala jattyǵyp júr. Aralarynda aýdandyq jáne oblystyq jarystardyń júlde­gerleri de bar. Burynyraq mektep dırektory Toılybek Shaharbaev Qajymuqan eskertkishiniń eskızi men smetasyn daıyndaǵan bola­tyn. Biraq aýdan ákimdigi: “Ákimniń jumysyna aralas­pańdar”, – degen soń, sol is te “jabýly qazan jabýly” bolyp qaldy. 90-shy jyldary “Qajy­muqan qory” da qurylǵan edi. Sol qorǵa aýyl bolyp 1 mıllıon rýbl jınap ótkizgen bolatynbyz. Onyń qaı iske jumsalǵany belgisiz. Já, óter is ótti, bolar nárse boldy ǵoı. Endi ol kisiniń qadir-qasıetin qalaı kóteremiz degendi oılaýymyz kerek. Oblys ákim­dikterine, sport salasynyń basshylaryna usynys jasaıyq, sóıtip, eldigimizdi tanytaıyq. Sonda ǵana Qajymuqan bar qazaqtyń batyr-balýany bolyp tulǵalana túsedi dep oılaımyn. A. ARYSTANBEKOV, zeınetker. Aqmola oblysy, Selınograd aýdany, Qajymuqan aýyly.