Keıingi kezde túrli jobalarǵa muryndyq bolyp, áleýmettik jelilerde tanymal bola bastaǵan Ashat Qajytaı esimdi qaraǵandylyq azamat taǵy bir qyzǵylyqty iske bastamashy boldy. Ol «Jaıaý» dep atalǵan tanymdyq týrızm jobasyn qolǵa alyp, Qaraǵandy qalasynan Aqtoǵaı aýdanyndaǵy Qyzylaraı aýylyna jaıaýlatyp jolǵa shyqty.
Aıta ketý kerek, oblys ortalyǵy men atalǵan aýdannyń, naqtyraq aıtqanda, saıahatshy dittegen Aqsorań taýynyń araqashyqtyǵy 333 shaqyrymdy quraıdy.
– Joba bes baǵyttan turady. Onyń birinshisi – Qaraǵandy-Qyzylaraı marshrýty. Bul sapar 24 mamyrda Aqsorań taýynyń shyńyna kóterilip, tý tigýmen aıaqtalady. Kelesi baǵyt – Qaraǵandy-Ulytaý. Sátin salsa, jaıaý marafon kúzde Túrkistanda aıaqtalýy tıis. Meniń jobamnyń negizgi maqsaty – bizdiń eldiń tarıhı jáne mádenı qundylyqtaryn pash etý. Jolda kezdesken ár aýyldyń ótkeni men búgini týraly aıtyp, qyzyqty adamdardyń portretterin jasaǵym keledi. Sońǵy ýaqytta tanymal bolyp kele jatqan eko jáne etnotýrızmge basa nazar aýdaramyn. Bir kúnde 56-60 shaqyrymnan júrip ótip, jeti kún ishinde Qyzylaraıǵa jetemin dep oılaımyn, – deıdi Ashat Qajytaı.
Saıahatshy bul jobasyn el Táýelsizdiginiń 30 jyldyǵyna, ult kósemi Álıhan Bókeıhannyń 155 jyldyq, Alash arystary Jaqyp Aqbaıdyń 145 jyldyq jáne Álimhan Ermekovtiń 130 jyldyq mereıtoılaryna arnaıtynyn málimdedi.
Qaraǵandy oblysy