Koronavırýstyń taralýyna jol bermeý jónindegi vedomstvoaralyq komıssııa álemdegi ahýalǵa qatysty aqparat jarııalady, dep habarlaıdy Egemen.kz.
145 mıllıonǵa jýyq naýqas indetten jazyldy, 3,4 mıllıon adam qaıtys boldy. Sondaı-aq álemdegi 1,5 mlrd astam adam koronavırýsqa qarsy vaksına aldy.
Eýropa vaksına alǵandardy kirgize bastaıdy. Alaıda barlyǵyna birdeı ruqsat joq
Eýroodaq memleketteri Eýropalyq komıssııanyń úshinshi elderden kelgen týrıster úshin kirýdiń jańa erejeleri týraly usynysyn maquldady.
EO elderine kirýdiń qatań karantın erejeleri týrıstik maýsymǵa baılanysty jeńildetiledi. Qazir Eýropaǵa karantınsiz jáne dáleldi sebepsiz tek 7 eldiń azamattaryna kirýge ruqsat, onyń ishinde vaksına alǵan-almaǵanyna qaramastan Avstralııa, Izraıl jáne Sıngapýr bar.
Jazǵa qaraı Eýropa Eýropalyq komıssııa bekitken vaksınalardyń birin alǵan barlyq týrısterdi qabyldamaq. Búgingi tańda BioNtech jáne Pfizer, AstraZeneca, Moderna jáne Johnson & Johnson preparattary maquldanǵan. Al Qytaıdyń Sinovac jáne Reseıdiń Spýtnık-V vaksınalary áli de baǵalaý satysynda.
Úndistan «qara zeńdi» jeńe almaı jatyr
Úndistan aýrýhanalarynda zeńge qarsy Amforesıtın V preparatynyń tapshylyǵy sezile bastady.
Bul – koronavırýsty emdeýde qoldanylatyn steroıdterden paıda bolatyn mýkormıkoz ınfekııasyna qarsy dári-dármek. Mýkormıkoz – Mucorales tuqymdas zeńderdiń ártúrli túrlerinen týyndaǵan aýrý. Ádette zeńder qaýipsiz, biraq ımmýndyq júıesi álsiregen adamdarǵa, mysaly, qant dıabeti, qaterli isik nemese AQTQ/JQTB-men aýyratyndar úshin murynnyń shyryshty qabyǵyna, ókpege jáne tipti mıǵa áser etýi múmkin.
Fransııada kafeler men barlar ashyldy
Fransııada sársenbiden bastap kafeler, barlar, dúkender, galereıalar men kınoteatrlar jumysqa oralady. Elde karantın jaǵdaıy jeńildep jatyr. Búginnen bastap búkil eldegi kafeler men meıramhanalardyń terrasalarynda alty adamǵa deıin kezdesýge ruqsat etiledi. О́tken jyldyń jeltoqsan aıynda engizilgen komendanttyq saǵat keshki jetiden toǵyzǵa aýystyrylady.
Elde vırýs juqtyrýdyń jańa jaǵdaılarynyń sany kúnine 13 myń deńgeıinde saqtalady. Tek sáýir aıynyń basynda bul san 40 myńǵa jetti.