Almaty qalasynda indetpen kúreske 14 mlrd teńge jumsaldy. Bul týraly «Medısınalyq saqtandyrý qory» KeAQ Almaty qalalyq fılıaly málim etti, dep habarlaıdy Egemen.kz.
Qordyń málimetinshe, medısınalyq saqtandyrý qory arqyly koronavırýs pen pnevmonııaǵa qarsy kúreske 71,6 mlrd teńgeden astam qarajat qarastyrylǵan. Bıylǵy jyldyń birinshi toqsanynda Almaty qalasy boıynsha indetke qarsy kúres sharalaryna 14,9 mlrd teńge jumsaldy.
«Koronavırýs pen pnevmonııa juqtyrǵan jaǵdaıda pasıentterge medısınalyq kómek saqtandyrylǵan-saqtandyrylmaǵanyna qaramastan kórsetiledi. Sondaı-aq, COVID-19 belgileri baıqalǵan nemese atalǵan vırýsqa shaldyqty degen kúdik keltirilgen azamattar mobıldi brıgadalar men úıdegi stasıonar qyzmetine júgine alady», dep habarlady qor ókilderi.
Jyl basynan beri Almaty qalasynda koronavırýs ınfeksııasyna qarsy kúreske bólingen 14,9 mlrd teńgeniń: - 7,8 mlrd teńge – medısına qyzmetkerlerine ústemaqyǵa; - 5,5 mlrd teńge – KVI boıynsha kórsetilgen medısınalyq kómekke jáne indettiń taralýyna jol bermeýge baǵyttalǵan is-sharalarǵa (karantındik jáne ınfeksııalyq stasıonarlarda em qabyldaý – 25 myń jaǵdaı); - 1,3 mlrd teńge – PSR-dıagnostıkaǵa (168 myń PSR test jasaldy); - 253,1 mlrd teńge – mobıldi brıgadalar qyzmetine (mobıldi brıgadalar 44,1 myń qyzmet kórsetken); - 7,4 mln teńge – úıdegi stasıonar qyzmetine (1390 pasıentke qyzmet kórsetilgen) jumsalǵan.
«Medısınalyq saqtandyrý qory» KEAQ Almaty qalalyq fılıaly dırektorynyń orynbasary Janar Kenjebaevanyń aıtýynsha, KVI-ge bólingen bıýdjettiń negizgi bóligi koronavırýsqa qarsy kúreske jumyldyrylǵan medısına qyzmetkerlerine qosymsha aqy tóleýge jumsaldy. «Jalpy alǵanda, qańtar aıynda 4987 medqyzmetkerge 1,8 mlrd teńge, aqpan aıynda 5365 mamanǵa 1,9 mlrd teńge qosymsha aqy tólendi. Naýryz aıynda 7202 qyzmetker 2,7 mlrd teńge ústemaqy aldy», deıdi Janar Kenjebaeva.