Aqyn, jazýshy, qoǵam jáne saıası qaıratker, Qazaq KSR-i Halyq jazýshysy – Oljas Súleımenovtiń 85 jyldyq mereıtoıy bul kúnderi Almatyda jalǵasyn taýyp otyr, dep habarlaıdy Egemen.kz.
Abaı atyndaǵy Qazaq Ulttyq akademııalyq opera jáne balet teatrynyń sahnasynda «Qazaqstan Kameratasy» memlekettik klassıkalyq mýzyka ansambliniń jáne «Qurmanǵazy» orkestriniń qatysýymen, Opera grýppasynyń jáne teatrdyń sımfonııalyq orkestriniń jetekshi solısteriniń merekelik konserti ótti. Teatr sahnasynan Oljas Súleımenovtyń óleńderine birqatar vokaldyq shyǵarmalar oryndaldy.
Qazaq ulttyq teatrynyń baı repertýarynda Zaýyrbek Raıbaevtyń qoıylymyndaǵy Tımýr Myńbaevtyń mýzykasyna qoıylǵan «Freskı» balet spektakli bar. Lıbrettosy bizdiń zamanymyzǵa deıin ańyzdar men dastandar túrinde jetken alys tarıhı oqıǵalar týraly poetıkalyq baıandalatyn Oljas Súleımenovtiń «Qysh kitap» atty aıtýly shyǵarmasynyń negizinde jazylǵan. Baletmeısterdiń ózi jazǵan lıbrettoda IV-VI ǵasyrlarda Qazaqstan terrıtorııasyn mekendegen ejelgi skıfterdiń tarıhy, ómiri, turmysy kórsetilgen.
Oljas Súleımenovtiń shyǵarmashylyǵy sheksiz. Eren eńbeginiń arqasynda jazýshynyń shyǵarmalary ǵalamǵa tanyldy, aqynnyń ssenarııleri boıynsha «Zemlıa Otsov», «Sınıı marshrýt», «Zıma – ne polevoı sezon», «Prımıte Adama», «Poslednıı perehod» kórkem fılmderi jaryq kórip, qazaq kınematografııasy búkil álemge tanymal boldy.
Aqynnyń shyǵarmashylyǵy «eki álemniń shekarasyn» – Eýropa men Azııany ushtastyrady. Oljas Súleımenovtyń tvorchestvosy – tarıh pen mádenıettiń tańǵajaıyp tildik baılyǵymen úılesýi, onyń paıymdaýlarynda ulttyq ádebıet pen mádenıettiń taǵdyry, Qazaqstannyń álemdegi orny, saıasat pen lıngvıstıka, tildiń, ádebıettiń jáne qoǵamnyń damýy týraly oı júgirtý sııaqty keń aýqymdy máseleler qozǵalady.