Kenshiler astanasyndaǵy Qaztutynýodaǵynyń Qaraǵandy ekonomıkalyq ýnıversıtetinde dene tárbıesi men sportqa erekshe mańyz berilgen. Mundaǵy sport kesheninde jyl saıyn túrli respýblıkalyq jáne oblystyq deńgeıdegi jarystar men týrnırler ótip turady.
Sonymen qatar atalǵan oqý ornynda elimizge belgili kóptegen sportshy bilim alǵan. Mysaly, olardyń qataryna boksshylar – Olımpıadanyń qola júldegeri Serik Eleýov, Olımpıadanyń kúmis júldegeri Vasılıı Levıt, álem chempıonatynyń kúmis júldegeri Qamshybek Qońqabaev, álem chempıonatynyń eki dúrkin qola júldegeri Abylaıhan Júsipovti, sondaı-aq balýan, Olımpıadanyń qola júldegeri Elmıra Syzdyqovany, konkımen júgirýshi, Azııa oıyndarynyń chempıony, úsh birdeı Qysqy Olımpııa oıyndarynyń qatysýshysy Ekaterına Aıdovany jáne basqalardy qosýǵa bolady.
Taıaýda osy ýnıversıtette kásibı sporttyq kerek-jaraqpen jabdyqtalǵan jattyǵý zaly saltanatty túrde ashyldy. Oqý ornynyń basshylary bul zaldyń «Dene tárbıesi jáne sport menedjmenti» mamandyǵy úshin zerthana retinde paıdalanylatynyn da aıtady. Munda emdik dene shynyqtyrý, fıtnes-tehnologııalar, tańdalǵan sport túrinde oqytý ádistemesi sııaqty pánder oqytylatyn bolady. Sonymen qatar bul zalda fýtzal, voleıbol, basketbol, jeńil atletıka boıynsha ýnıversıtet qurama komandalarynyń jattyǵýlary ótedi.
Aıta ketý kerek, atalǵan zalda kásibı sport jabdyqtary ónimderimen aty álemge tanymal bolǵan Shandong Tianzhan Fitness Equipment Co kompanııasynyń 19 túrli jattyǵý quraly ornatylǵan.
QARAǴANDY