Tabıǵat tazalyǵyna túrli jolmen kóńil bólýge bolady. Sondaı erekshe jobany EcoQolday ekologııalyq teatry qolǵa alyp otyr. О́ner ujymy tek balalardan quralǵan. Ol jerde shyǵarmashylyq ujym turmystyq qaldyqtardy bólip tastaý, qorshaǵan ortany qorǵaý taqyryptaryna qatysty qoıylymdar ázirleıdi.
Teatr shymyldyǵy «Grıneıkter hıkaıasy» spektaklimen ashyldy. Atalǵan pesa ekologııalyq taqyrypty negiz etken erteginiń jelisimen jazylǵan. Spektakldi orys drama teatrynyń kásibı qoıýshy-rejısserleri daıyndapty. Osy aıda teatr óz kórermenderine taǵy eki spektakl usynýǵa nıetti.
Spektakl kórýge nemese akterlik sheberlik kýrstaryna qatysýdyń joly da qyzyq. Ol úshin makýlatýra, plastık jáne shyny degen sekildi qaıtalama shıkizatty qaıta óńdeýge tapsyrý qajet. Sondaı-aq ınklıýzıvti bilim berýdi damytý maqsatynda teatr qabyrǵasynda «Eko-sheberhana» áleýmettik jobasy ashylǵan. Ol jerde de turmystyq qaldyqtardy bólek suryptaý boıynsha sabaqtar ótkizilip, eski turmystyq elektr tehnıkasyn bólshektep, ony qaıta óńdeýge jiberý joldary úıretiledi.
Eko-teatr bazasynda oıyn aımaǵy da bar. Munda balalarǵa ekologııalyq mádenıet negizderi, qaıta óńdeletin qaldyqtardy úıde suryptaý, sondaı-aq qorshaǵan orta úshin bólek jınaýdyń artyqshylyqtary túsindiriledi. Munyń barlyǵy oqýshyǵa qyzyqty ári uǵynyqty bolý úshin oıyn túrinde ótkiziledi. Sonymen qatar elorda oqýshylarynyń ınnovasııalyq ekologııalyq jobalary da nazardan tys qalmaıdy.
– «Kez kelgen qoqysqa ekinshi uran syıla» degen ustanymdy negiz etip teatrdy ashyp otyrmyz. Teatr jumysy ınteraktıvti túrde ótedi. Kelgen kórermender spektakldi tamashalap qana qoımaı, túrli sheberlik synyptaryna qatysa alady. Teatrdyń basty maqsaty – ómirge endi aralasyp, beıimdelip kele jatqan jasóspirimderdiń ekologııalyq túsinigin keńeıtý, eko-saýattylyǵyn arttyrý. Eko-teatr osyndaı úlken maqsatty ıgere alady degen oıdamyz. Shyny kerek, qoǵamda qoqysty kóshege tastaı salý, janýarlarǵa dórekilik kórsetý sııaqty áreketter beleń alyp tur. Nur-Sultan qalasynyń ózinde sary jáne jasyl konteınerler bar. Alaıda kópshilik turǵyn olardyń aıyrmashylyqtaryn bile bermeıdi. Mine, osyndaı qordalanǵan máselelerdi kórkemdep, óńdep balalardyń aýzymen, olardyń is-qımylymen kórermenge jetkizsek degen nıetimiz bar, – deıdi «Jasulan» biryńǵaı balalar men jasóspirimder uıymynyń tóraıymy Dınara Sádýaqasova.
Elimizde alǵash ret eńse kóterip otyrǵan EcoQolday jobasy О́KM operatorynyń bastamasymen, Nur-Sultan qalasy ákimdigi, «Adal nıet» qory, Clean City NC kompanııasy jáne «Jas Ulan» RQB qoldaýymen júzege asyrylýda. Tusaýkeser spektaklde №83 mektep oqýshylary oınap shyqty. Aldaǵy ýaqytta teatr jumysyna shahardaǵy ózge bilim ordalarynyń oqýshylary da atsalyspaq.