Álem chempıonatyn sátti bastady

Jalpy bıylǵy jahandyq dodanyń alǵashqy kúninen bastap matchtar óte tartysty ári tosyn nátıjelermen bas­taldy. Máselen, V tobyndaǵy alǵashqy týrda Latvııa hokkeıshileri álem chempıonatynda 26 márte top jaryp, Olımpııa oıyndarynda 9 ret úzdik shyqqan Úıeńki japyraqtar eliniń  quramasyn 2:0 esebimen jeńip, birinshiliktiń alǵashqy sensasııasyn jasady. Al araǵa bir kún salyp Qazaqstan quramasymen jolyqqan muzaıdyn ıeleri teń dárejede ótken tartysty básekede ese jiberdi.

Araǵa bes jyl salyp shaıbaly hokkeıden elıtaly álem chempıonatyna oralǵan Iýrıı Mıhaılıs shákirtteri osylaısha týrnırdi kóterińki kóńil kúımen bastady. Latvııamen ótken oıynnyń alǵashqy kezeńinen keıin komandalar úziliske teń eseppen shyqty. Alǵashqy 20 mınýtta eki quramanyń oıynshylarynda da gol soǵatyn tamasha múmkindikter bolǵanymen, qaqpashylar qyraǵylyq tanytyp, qaqpalaryna birde-bir shaıba ótkizgen joq.

Qazaqstandyq hokkeıshilerge qara­ǵanda bir kún buryn muzaıdynǵa shyǵyp, oıyn tájirıbesine ıe bolǵan muzaıdyn ıeleri birinshi bolyp kezdesýdiń ese­bin ashty. Matchtyń 27-mınýtynda Lat­vııa quramasynan Laýrıs Darzınsh mer­gendigimen kózge túsip, 2018 jyldan keıin ulttyq quramaǵa oralǵan qaqpashymyz Nıkıta Boıarkındi qapy qaldyrdy. Qazirgi tańda Boıarkın Qaraǵandynyń «Temirtaý» klýbynyń qaqpasyn qorǵaıdy.

Gol soqqannan keıin qarqynyn údete túsken Latvııa oıynshylary esepti eseleýge tyrysyp, komanda bolyp alǵa qaraı umtylǵan edi. Biraq qorǵanysty umyt qaldyrǵan jarys qojaıyndary Qazaqstan quramasynyń oıynshysyna qarsy tártip buzyp, qorǵaýshy Ývıs Iаnıs Balınskıs tóreshi tarapynan eki mınýt aıyp jazasyna tartyldy. Osylaısha san basymdyǵyna ıe bolyp, esepti teńestiretin tamasha múmkindikke ıe bolǵan jerlesterimiz urymtal sátti múlt jibermedi. Komanda kapıtany Roman Starchenko men onyń assıstenti Darren Dısten tamasha pas alǵan Aleksandr Shın qaqpany dál kózdedi. Sóıtip ol Qazaqstan quramasynyń bıylǵy álem chempıonatynda soǵylǵan alǵashqy shaıbasynyń avtory atandy.

Úshinshi kezeńde qarqyndaryn báseń­detpegen eki qurama oıynshylary taǵy da bir shaıbamen almasty. 45-mınýtta Rıhards Býkarts komandasyn esepte qaıta alǵa shyǵarsa, araǵa 12 sekýnd sa­lyp Djessı Bleker esepti teńestirip ket­ti. Match sońyna deıin tablodaǵy esep ózge­ris­siz qalyp, oıyn overtaımǵa ulas­ty. Alaıda qosymsha ýaqytta da hok­keı­­shi­ler bir-biriniń qaqpa kiltin taba al­mady.

Bul kezdesýde jeńimpaz komandanyń esimi oıyn sońyndaǵy býllıt serııasynda (hokkeıdegi penaltı) anyqtaldy. Sheshýshi sátte Latvııa quramasyna qara­ǵanda dáldik tanytqan jerlesterimiz 4:3 esebimen muzaıdyn ıelerinen jeńis­ti julyp aldy. Býllıt serııasynda Alek­sandr Shın, Nıkıta Mıhaılıs, Roman Starchenko jáne Evgenıı Rymarev qaqpany dál kózdep, jankúıerlerge jeńis syılady.

Oıynnan keıin Qazaqstan qura­ma komandasynyń bas bapkeri Iýrıı Mı­haılıs suhbat berip, barsha Qazaqstandyq hokkeı jankúıerlerine qýanysh syılaǵan shákirtterine rızashylyǵyn bildirdi.

– О́te tartysty oıyn boldy. Biz áý basta-aq Latvııa quramasynyń qalaı oınaıtynyn bildik jáne osy oıynǵa daıyn boldyq. Jigitter búgingi oıynda hokkeıshige tán minez, tabandylyq kórsetti. Alǵashqy mınýttardan bas­tap belsendi oınap, qarsylasty barynsha sastyrýǵa tyrystyq. Meniń oıymsha, josparymyz iske asty, degenmen keı sátterde qarsylastarymyzdyń erkin qımyldaýyna da múmkindik berip qoıdyq. Jalpy jigitterdiń búgingi oıynyna kóńilim toldy, bárine rızamyn, olar búgin keremet oıyn órnegin kórsetti. Bizdiń hokkeıshiler – Otan úshin, Qazaqstan úshin kúresken naǵyz erler, – dedi bas bapker.

Alǵashqy eki kúnniń nátıjesi bo­ıynsha, 2 upaıǵa qol jetkizgen Qazaqstan quramasy V tobynda 4-orynǵa turaqtady. Alǵashqy týrda Italııa quramasynan 9:4, ekinshi týrda Norvegııa quramasynan 5:1 esebimen aılasyn asyrǵan germanııalyq hokkeıshiler 6 upaımen kósh bastap tur. Al Kanadany 2:0 esebimen jeńip, Qazaqstannan utylǵan Latvııa 4 upaımen 2-orynda. Birinshi týrda AQSh-tan basym túsken Fınlıandııa bolsa 3 upaımen 3-orynda keledi. Al birde-bir upaı alma­ǵan AQSh, Kanada, Norvegııa jáne Ita­lııa hokkeıshileri 5-8 oryndardy ózara bólisip tur. Bul – V tobyndaǵy jaǵdaı.

A tobyndaǵy básekeler de tartysty ótýde. Eń keıingi ret 2012 jylǵy álem chempıonatynda dara shyqqan Reseı hokkeıshileri alǵashqy týrda Chehııa quramasynan basym tústi. Jeti shaıba soǵylǵan kezdesýde soltústiktegi kórshilerimiz sońǵy sátte jeńisti julyp aldy. Matchtyń aıaqtalýyna 19 sekýnd qalǵanda Mıhaıl Grıgorenko gol soǵyp, Reseı quramasyna mańyzdy úsh upaıdy syılady. Al ekinshi týrda Ulybrıtanııa hokkeıshilerin 7:1 esebimen utqan Reseı 6 upaımen týrnır kestesinde jeke-dara kósh bastady.

Keıingi oryndarǵa birinshi týrda qarsylastarynan basym túsken Slova­kııa, Shveısarııa jáne Danııa quramalary jaıǵasqan. Atap aıtar bolsaq, alǵashqy týrda Slovakııa Belarýs quramasynan 5:2 nátıjesimen basym tússe, Shveısarııa dál osyndaı eseppen Chehııa hokkeıshilerin jeńdi. Al Danııa álem chempıonattarynda alǵash ret Shvesııadan aılasyn asyrdy. Esep – 4:3.

Keshe keshkisin Fınlıandııamen oına­ǵan Qazaqstan quramasy keıingi týrlarda –  AQSh (25 mamyr), Germanııa (26 mamyr), Kanada (28 mamyr), Italııa (29 mamyr) jáne Norvegııa (31 mamyr) hokkeıshilerimen kezdesedi.