Qostanaı oblysyndaǵy kúre joldardyń boıynda úı janýarlarynyń maketteri paıda boldy. Jergilikti bılik ókilderiniń aıtýynsha, jol shetine qoıylǵan mundaı maketter kólik apatynyń azaıýyna kómegin tıgizedi.
Taıaýda ǵana Qarasý jáne Úlken Chýrakov eldi mekenderiniń arasyndaǵy tas joldyń boıyna kartonnan istelgen 3 sıyr maketi ornatyldy. Mundaı maketterge jaıylymǵa malyn kúndelikti kúre jol arqyly aıdap ótetin eldi mekenderdiń turǵyndary da qyzyǵýshylyq tanytýda.
– Bizdiń tóńirekte jaıylym joq. Jergilikti sharýashylyq esiktiń aldyna deıin kópjyldyq shabyndyq egip tastaǵan. Osy mańdaǵy 30 shaqty úıdiń malyn aýyldyń shetinen ótetin kúre joldyń arǵy betine aıdaımyz. Ersili-qarsyly ótip jatqan kólikter keıde malymyzdy qaǵyp ketip jatady. Mundaıda jeme-jemge kelgende mal ıesi kináli bolyp shyǵady. Qazirgi zań boıynsha maldy qaraýsyz jiberýge bolmaıdy. Sondyqtan qansha joǵary jyldamdyqpen quıǵytyp kele jatsa da, zań kólik júrgizýshiniń jaǵynda. Maldyń mańaıynan adam kórinbese boldy, qaraýsyz júrgen bolyp shyǵady. Eshkim tańerteńnen keshke deıin birdi-ekili maldyń sońynan salpaqtap júrmeıdi, úıde de sharýa bar. Sondyqtan jol boıyna ornatylyp jatqan sıyr maketteri mundaı keleńsizdiktiń aldyn alady dep oılaımyn. Jolǵa jaqyn turǵan janýardy kórgen júrgizýshi de aldyn ala jyldamdyǵyn tejep, qaýipti aımaqtan abaılap ótetin bolady. Mundaı jol qaýipsizdigin eskertetin maketterdi bizdiń aýylǵa 2-3 jerden ornatsa olqy emes, – deıdi Aısary aýylynyń turǵyny Ámir Qaıyrov.
Oblysta dál osyndaı maketterdi mal jaıylymy jaqyn ornalasqan basqa baǵyttaǵy tas joldardyń boıyna da ornatý kózdelip otyr. Jolaýshylar transporty jáne avtokólik joldary basqarmasynyń ókilderi aldaǵy ýaqytta jol qaýipsizdigin eskertetin janýarlar maketteriniń Arqalyq – Torǵaı, Qarameńdi – Razdolnyı – Aralkól baǵytyndaǵy qaýipti jol ýchaskelerine de qoıylatynyn aıtty.
Qostanaı oblysy