Iordanııa astanasy – Ammanda ótip jatqan taekvondodan Olımpııa oıyndaryna joldama beretin Azııa qurlyǵyndaǵy irikteý jarysynda eki jerlesimiz fınalǵa shyǵyp, el qorjynyna kezekti Olımpıada joldamasyn saldy.
Ammandaǵy jarystyń ekinshi kúninde qyzdar arasynda 67 kılodan joǵary salmaqta Qazaqstan quramasynan synǵa túsken Jansel Denız jartylaı fınalda tájikstandyq Mohrý Halımovany 12:2 esebimen jeńip fınalǵa shyqsa, erler arasynda baq synaǵan Rýslan Japarov (+80 kg) ta qarsylastaryn qoǵadaı japyryp, fınalǵa joldama aldy. Ol jartylaı fınalda Halyqaralyq taekvondo federasııasynyń atynan shyqqan ırandyq sportshy Amırı Alı Akbardy 31:20 esebimen utty.
Irikteý jarysynyń erejesi boıynsha, fınalǵa shyqqan eki sportshyǵa avtomatty túrde Olımpıada lısenzııasy beriledi. Sóıtip, 2016 jyly Brazılııada ótken Olımpııa oıyndarynda da óner kórsetken Rýslan men Jansel ózderiniń ekinshi Olımpıadasyna qatysýǵa múmkindik aldy.
Qazirshe Qazaqstan quramasy Japonııada jalaýy jelbireıtin Jazǵy Olımpııa oıyndaryna jalpy sany 55 joldama jeńip aldy.