Elordada 24 mamyr kúngi aqparat boıynsha 152 myńnan astam adam koronavırýstyq ınfeksııaǵa qarsy vaksınanyń 1 komponentin aldy, dep habarlaıdy elorda ákimdiginiń resmı saıty.
Qala turǵyndary men qonaqtary qytaılyq Sinofarm Hayat-Vak jáne reseılik «Spýtnık-V» vaksınasyn qabyldaı alady.
Basqarma qoımalarynda joǵaryda atalǵan vaksınalardyń dozalary jetkilikti ekeni habarlandy.
Sondaı-aq, vedomstvo málimetinshe, qalanyń SOO-larynda jáne saýda keshenderinde egý aımaqtary ashylǵannan beri 22,7 myńnan astam adam vaksına alǵan.
Esterińizge sala keteıik, halyqty vaksınasııamen keńinen qamtý úshin Nur-Sultan qalasynyń ákimi Altaı Kólginovtiń tapsyrmasy boıynsha egý pýnktteriniń sany 36-dan 100-ge deıin ulǵaıtyldy. Búginde elordada «Mega Silk Way», «Keruen», «Han Shatyr», «Abý-Dabı Plaza», «Azııa Park» SOO-larynda, sondaı-aq «Saryarqa», «Astanalyq», «Álem» saýda úılerinde ashyldy.
Vaksınasııa pýnktteriniń keńeıýine baılanysty BMSK uıymdarynyń jumys ýaqyty qysqaryp, 08:00-22:00 aralyǵyna belgilense, SOO-lar úshin jumys tártibi ózgerissiz qalady – saǵat 10:00-den 22:00-ge deıin.