Álem chempıondaryn qapy qaldyrdy

Alǵashqy týrda jarys­ty uıym­dastyrýshylar – Latvııadan býllıt serııasynda basym túsip, álem chempıonatyn kóterińki kóńil kúıde bastaǵan Qazaqstan quramasynyń hokkeıshileri ekinshi týrda da jeńisti jolyn jalǵady. Jerlesterimiz top­tyq kezeńniń ekinshi match­ynda 2019 jyly Slovakııada uıymdastyrylǵan sońǵy álem chempıonatynyń jeńim­pazy – Fınlıandııa hokkeı­shilermen kezdesip, negizgi ýaqytta 1:1 esebimen teń tústi. Overtaımda da jeńim­paz komanda anyqtalmady. Match sońyn­daǵy býllıt serııasynda baǵy janyp, qarsylastaryna qara­ǵan­da myqtylyq tanyt­qan qazaq­standyq hokkeı­shi­ler álem chempıon­darynyń ji­gerin qum qyldy.

Kezdesýdiń birinshi kezeńinde komandalar bir-biriniń qaqpasyna shaıba soǵa almaı, úziliske teń eseppen shyqty.

Degenmen bul kezeńde Fın­lıandııa hokkeıshileri basym boldy. Alǵashqy 20 mınýtta qarsylastar bizdiń qaqpaǵa 15 dál soqqy jasasa, qazaqstandyq hokkeıshiler bir ǵana anyq soqqymen shekteldi. Úzilisten keıin azdap es jıǵan jerlesterimiz qarsylastyń qaqpa mańaıynda jıi boı kórsete bas­tady. Alaıda esepti birinshi bolyp Fınlıandııa quramasy ashty. Ekinshi kezeńniń 34-mınýtynda Anton Lýndell qarbalas sátte qaqpashymyz Nıkıta Boıarkındi qapy qaldyryp, gol soǵyp ketti. Dese de álem chempıondarynyń qýanyshy uzaqqa sozylǵan joq. Aradan eki jarym mınýt ót­ken­de jerlesterimiz tara­zy ba­syn teńestirdi. Nı­kı­ta Mı­haılısten pas alǵan sha­býyl­shy Kırıll Panıýkov mergen­­digimen kózge túsip, álem chempıonatyndaǵy alǵashqy shaıbasyn saldy.

Úshinshi kezeńde de tablodaǵy kórsetkish ózgerissiz qalyp, kezdesý overtaımǵa ulasty. Qosymsha ýaqytta da komandalar jeńimpazdy anyqtaı almady. Al býllıtte Qazaqstan quramasy 3:1 esebimen jeńiske jetti. Sheshýshi goldyń avtory – Roman Starchenko boldy. Sondaı-aq Kertıs Volk pen Nıkıta Mıhaılıs te gol soqty.

Tarıhqa kóz júgirter bolsaq, Qazaqstan men Fınlıandııa quramalary búginge deıin ózara tórt márte muzaıdynda jolyǵyp, barlyq match Fınlıandııanyń jeńisimen aıaqtalǵan. Mine, be­sinshi kezdesý degende Qazaqstan quramasy úsh dúrkin álem chempıondaryn jeńdi.

Jankúıerlerdiń pikiri bo­ıynsha, Qazaqstan quramasynyń qaqpashysy Nıkıta Boıarkın úshinshi jarys kúniniń úz­dik oıynshysy atandy. Halyq­aralyq shaı­baly hokkeı fede­rasııa­synyń týıtterdegi resmı paraq­shasynda júrgizilgen saýaldama jankúıerlerdiń 30,6 paıyzy Boıarkındi qoldaǵan. Keıin­­gi oryndarǵa Trevor Mýr (AQSh, 26,5), Matıas Tret­te­nes (Nor­vegııa, 24,7) jáne Den­nı Teılor (Belarýs, 18,2) jaı­ǵas­qan.

Osylaısha, ekinshi týrda álem chempıondaryn jeńgen Qazaqstan quramasy V tobyndaǵy týrnır kestesinde ekinshi orynǵa kóterilip, pleı-off kezeńine taǵy bir qadam jaqyndady. Jer­lesterimizdiń enshisinde 4 upaı bar. Al eki oıynda upaıdan shashaý shyǵarmaǵan Germanııa 6 upaımen top basynda keledi. Sondaı-aq 4 upaıy bar Latvııa men Fınlıandııa úshinshi jáne tórtinshi oryndardy bólisip tur.

Birinshi týrda Fınlıandııadan jeńilgen AQSh quramasy ekinshi týrda Kanada hokkeıshilerin 5:1 esebimen jeńip, alǵashqy 3 upaıyna qol jetkizdi. Kanada osymen ekinshi oıynda jeńildi. Sonymen qatar bizdiń topta óner kórsetetin Norvegııa quramasy da Italııany (4:1) utyp, alǵashqy upaılaryn ıelendi.

Sondaı-aq keshegi kúnniń taǵy bir sensasııasyn Belarýs hokkeıshileri tirkedi. 2017 jáne 2018 jyldardaǵy álem chempıonattarynda qatarynan eki jyl bas júldeni ıelengen Shvesııa quramasymen kezdesken Belarýs 1:0 esebimen jeńiske jetti. Shvesııa qatarynan ekinshi oıynda bir shaıba aıyrmashylyǵymen jeńildi. A tobynda baq synap jat­qan Slovakııa ekinshi týrda Uly­brıtanııa hokkeıshilerin 2:1 nátıjesimen tize búktirse, Shveı­sarııa Danııany utty. Esep – 1:0.

A tobyndaǵy týrnır keste­sinde eki oıynda 6 upaıdan jınaǵan Reseı, Slovakııa jáne Shveısarııa quramalary kósh bas­tady. Al 3 upaıy bar Danııa men Belarýs úshinshi jáne tórtinshi oryndy bólisip tur.

Aıta keteıik, Qazaqstan qu­ramasy kelesi oıynyn búgin AQSh quramasymen ótkizedi.