Djordj Floıdtyń ómirden ótkenine bir jyl ótýine baılanysty Floıd otbasynyń músheleri, Black lives matter mıtıngilerinde jaqyndaryn joǵaltqan basqa da azamattar marshqa shyqty.
Jeksenbide Mınneapolıste bastaý alǵan marsh memleket boıynsha jalǵasyp, taǵy da jalpyulttyq sıpat ıelenedi dep josparlanǵan. Belsendiler Djordj Floıd, Fılando Kastıl jáne polısııa qolynan qaza tapqan basqa da afroamerıkalyqtardyń sýretterin qoldaryna alyp, qaladaǵy sot ǵımaratynyń aldyna jınaldy.
Odan basqa, «Ádildik ornamaı, beıbitshilik joq» degen jazý ustaǵandar kóp. Medıa bul qozǵalysta marqum Floıdtyń otbasy óte belsendi ekenin aıtady.
«Bul azapqa toly bir jyl boldy. Jeke ózim úshin de, otbasym úshin de qas qaǵym sátte ómirimiz kúrt ózgerip ketti. Sebebin áli de túsine alar emespin», deıdi Floıdtyń qaryndasy Brıdjet.
Osydan dál bir jyl buryn afroamerıkalyq jigit polısııa qolynan qaza tapty. Kisi ólimi boıynsha aıyptalǵan Derek Chaývınge qatysty úkim 2021 jyly 20 sáýirde shyqty. Polısııa qyzmetkeriniń 8 mınýt boıy marqum Djordjdyń moınyn aıaǵymen basyp turǵany rastaldy. Bul oqıǵa AQSh-taǵy afroamerıkalyqtardyń kóterilýine sebep boldy. Sodan keıin AQSh kóshelerinde birneshe aptaǵa ulasqan narazylyqtar, marshtar, tipti qaqtyǵystar boldy.
Belsendiler AQSh Senatynyń nazar aýdarýyn talap etýde. Floıd otbasynyń qorǵaýshysy Ben Kramp ta Senatqa zańǵa ózgeris engizý kerek degen talap aıtty. О́zgerister polıseılerge adamdy tutqyndaý kezinde qylqyndyrý tásilin qoldanýǵa tyıym salyp, qyzmet barysynda qate jibergen quqyq qorǵaý organdary qyzmetkerleriniń tizimin jasaýdy qarastyrýy kerek deıdi. «Biz Vashıngtonnyń nazar aýdarǵanyn qalaımyz. Biz federaldyq zańdy ózgertkimiz keledi. Daýys berip, ózgeris engizetin kez keldi», dedi zańger.
«Belsendilik kúni» dep atalatyn aksııa da birneshe kúnge sozylady dep josparlanǵan. Olar AQSh azamattaryn beıjaı qaramaı, zańǵa ózgeris engizýge atsalysýǵa shaqyrýda.