Búginde elimizde 500-den astam jastar resýrstyq ortalyǵy bar. Jumysyna qulshyna kirisken jastardyń qatarynda Shamıl Dúısenǵazyuly da júr. Ol jetekshilik jasaıtyn Menin Armanym qory sanaýly ýaqyt ishinde aıtarlyqtaı jetistikterge jetti.
Shamıl Dúısenǵazyuly Almaty qalasynda dúnıege kelgen. Shahardaǵy №173 mektep-lıseıdi úzdik támamdap, elordadaǵy KAZGUU ýnıversıtetine túsedi. Ortasynan eren shyǵyp, bilim ordasyndaǵy jastar uıymyn basqarady. Keıinnen respýblıka kólemindegi «Stýdenttik uıymdardy baǵalaý» júıesin jańǵyrtyp, jańa deńgeıge kóterýge yqpalyn tıgizedi. Odan ózge, Sýleımen Demırel atyndaǵy ýnıversıtette jastar komıtetin qolǵa alyp, alǵashqylardyń biri bolyp Academic zań klınıkasynyń negizin qalaıdy. Qazirgi tańda ol basshylyq jasaıtyn Menin Armanym qory ilgeri qadamdar jasap jatyr. Sonyń dáleli – atalǵan qor eriktilermen birge onkologııalyq aýrýǵa shaldyqqan 31 balanyń armanyn oryndady. Jalpy, qor jumysy arnaıy toqsanǵa bólingen. Sonyń nátıjesinde, naýryz aıyna deıin 20 balanyń, al osy sáýir aıynda taǵy 11 balanyń armanyn oryndaýǵa atsalysqan.
Qordyń negizgi baǵdary búkil respýblıkaǵa baǵyttalǵan. Qazirdiń ózinde Almaty qalasy jáne Túrkistan, Batys Qazaqstan óńirlerinde iri jobalar iske asty. Mundaı aýyr dertke shaldyqqan balalalardy emdeıtin eń iri ortalyq Almaty qalasynda ornalasqandyqtan, basty resýrsty osy óńirge jumsap otyr. Almaty qalasy boıynsha 18 balanyń, oblys boıynsha 7 balanyń qalaýymen aıtýly is-sharalar júzege asyryldy. Qalǵan balalar Túrkistan jáne Batys Qazaqstan oblystarynan boldy.
Jýyrda uıym ókilderi muhıt asyp, qupııaǵa toly Mysyr eline saıahattap keldi. Olar kóne Mysyrǵa Farıza esimdi qyzdyń armanyn oryndaýǵa bardy. Sapar barysy qanshalyqty qıyn ári qyzyq bolǵanyn Shamıl Dúısenǵazyulynyń ózi tarqatyp berdi.
«Bul sapar – qordyń mereıtoıyna tuspa-tus kelgen 25-armanymyz. Nege deseńiz, eriktilermen birge qysqa ýaqyt aralyǵynda 7 jas pen 18 jas arasyndaǵy balalardyń armanyn oryndaýǵa bir jeńnen – qol, bir jaǵadan – bas shyǵaryp kelemiz. Farıza Súleımenge toqtalsaq, ol – Qyzylorda oblysy Qazaly aýdanynyń týmasy. Sol aýylda oqyp júrip, onkologııalyq aýrýmen aýyrady. Qazaly aýdanyna áriptesim Oljas Espanmen birge baryp qaıttyq. Farıza búgingi tańda mekteptegi 11-synypta bilim alyp júr. Ony elimizge tanymal bilikti hırýrg maman emdegen eken. Biz barǵan kezde densaýlyǵy birshama qalpyna kelgen kórinedi. Sebebi buǵan deıin onyń tipti mektepke baryp, sabaq oqýǵa da densaýlyǵy múmkindik bermegen», deıdi qor dırektory.
Shamıl Dúısenǵazyulynyń aıtýynsha, alys saparǵa otandyq týrıstik kompanııa qoldaý kórsetken. Bul armandy oryndaý ózge armandarǵa qaraǵanda óte qıyn bolǵan kórinedi.
«Bul armandy oryndaýǵa bir aıdan asa ýaqyt ketti. Bul kezde Farızanyń basynda apparat bolǵandyqtan, kóp shýyldy kótere almaıtyn edi. Sony bilgennen keıin onyń dárigerinen ruqsat alyp, ata-anasynan qolhat aldyq. Aıtarlyqtaı táýekelge bardyq. Eń qýanyshtysy, saparymyz oıdaǵydaı boldy. Basqa balalardyń armanynyń oryndalý ýaqyty bir kún bolsa, al Farızaniki tórt kúnge sozyldy. Sharm ál-Sheıh kýrorttyq aımaǵyna bardyq. Endi osyndaı mereıtoılyq sátterdi keń kólemde ótkizýge tyrysamyz», deıdi Shamıl Dúısenǵazyuly.
Qazirgi kúni Menin Armanym qory kóldiń tamshysyndaı bolsa da, biraz asýdy baǵyndyryp jatyr. Basqa qorlarǵa qaraǵanda, aıtýly jetistikteri bar. AQSh-taǵy Make-A-Wish Foundation, kórshiles Reseıdegi «Mechtaı so mnoı» degen jobalar sekildi óz ómirsheńdigin kórsetý ústinde.