2020 jyly Shymkent qalasy boıynsha Jumyspen qamtý jol kartasy sheńberinde 44,7 mlrd teńge bólinip, 239 joba iske asyryldy. Ondaǵy 32,1 mlrd teńge «Báıterek» Ulttyq Basqarýshy holdıngi» AQ-nyń qarajaty bolsa, 12,5 mlrd teńge respýblıkalyq bıýdjet. Bul týraly búgin Shymkent qalasynyń ákimi Murat Áıtenov QR Premer-Mınıstri Asqar Mamınniń tóraǵalyǵymen ótken Úkimet otyrysynda málimdedi, dep habarlaıdy Egemen.kz.
Ákimniń aıtýynsha, memlekettik baǵdarlamanyń aıasynda júzege asyrylǵan jobalardyń ishinde 111-i ınjenerlik transporttyq ınfraqurylymda, 45 joba áleýmettik – mádenı nysandar, 45 joba turǵyn úı kommýnaldyq sharýashylyq bolsa, 38 joba abattandyrý eken.
«Osy baǵdarlamanyń júzege asyrylýynyń nátıjesinde ótken jyly 8 753 jumys oryndary ashyldy, sondaı-aq 634 adam turaqty jumyspen qamtyldy. Al tozyǵy jetken 15 bilim mekemeleriniń ǵımaraty kúrdeli jóndeýden ótkizildi. Úsh aýsymda bilim berýdiń aldyn alý maqsatynda eki mektep janynan qosymsha 300 oryndyq oqý korpýsy salynyp eki aýsymda 1200 bala bilim alýǵa múmkindikter týdy. Toǵyz mektepke sport alańshalary ornalastyrylyp, 11 myń balaǵa zamanǵa saı sportpen aınalysýyna jaǵdaı jasalyndy», dedi qala ákimi.
Sonymen birge 27 myńǵa jýyq adam sapaly aýyz sýmen jáne 5 myń adam sapaly elektr qýatymen qamtylǵan. Kárizben qamtylǵan turǵyndar sany 12 myń adamǵa artyp, qamtylý kórsetkishi 49,1%-dan, 50,2%-ǵa deıin ósse, jylý qubyrlarynyń tozý deńgeıi 42,7%-38%-ǵa tómendegen. Budan bólek, «О́temis» kanalynyń arnasy kúrdeli jóndeýden ótse, 109 avtomobıl joldary jóndeýden ótkizildi. Al 106 kóp qabatty turǵyn úıdiń 66 aýlasy abattandyrylyp, balalar oıyn alańshasy ornatylǵan.
Bul jumystardyń barlyǵy Jumyspen qamtýdyń jol kartasy aıasynda júzege asyrylǵan.