Beınebaqylaý kameralaryn kóptep ornatýdyń arqasynda elimizde sońǵy 5 jylda páter tonaý qylmysy 67 paıyzǵa kemigen. Máselen, 2016 jyly 44 myń páter tonaý deregi tirkelse, bul san byltyr 14 myńǵa deıin azaıǵan, dep habarlaıdy Egemen.kz.
Al bıylǵy tórt aıda 4 myńnan astam páter tonalǵan eken. Osy ýaqyt aralyǵynda qylmystyń bul túri 30 paıyzǵa tómendese, páter tonaýdy ashý kórsetkishi 13 paıyzǵa jaqsarǵan. Bul jóninde onlaın rejimde ótken brıfıng barysynda IIM Krımınaldyq polısııa departamenti basshysynyń orynbasary Qanat Nurmaǵambetov habarlady.
Jaqynda Qostanaı qalasynda bes birdeı páterdi úptep ketken eki ury ustaldy. Ákkiler páterdiń plastık terezelerin ashý arqyly ishke kirip, úı ıelerin jalpy somasy 1,5 mıllıon teńgege shyǵynǵa batyryp ketken. Polısııa qyzmetkerleri bul ekeýdiń buryn da sotty bolǵanyn anyqtap otyr. Olar qoldy qylǵan qymbat buıymdar men áshekeılerdi lombardtar arqyly satyp jiberip, aıǵaq zattardan tez qutylýdyń ońaı jolyn taýyp alǵan kórinedi.
IIM ókili páter urylarynyń jazadan jaltaryp ketýdiń san aılasyn «meńgerip» alǵanyn ashyq aıtty. Kóbine jábirlenýshiler men urylardyń tatýlasýynan keıin istiń tyǵyryqqa tirelip qalatynyn jetkizgen Q.Nurmaǵambetov: «Jaýapkershilikten jaltarý úshin urylar kóbinese shyǵynnyń ornyn toltyryp, jábirlenýshiniń tilin taýyp alyp jatady. Osydan keıin istiń deni sotqa deıin jetpeı, orta jolda toqtap qalatyn. Sol sebepti de mınıstrlik qylmystyq is júrgizý is-sharalaryn jetildirýdi qolǵa alyp, birqatar uıymdastyrýshylyq jáne zańnamalyq bastamany iske asyryp keledi. Tájirıbede jıi kezdesetin «jazadan jaltarý» máselesin jan-jaqty zerdeleı kele, 2018 jáne 2019 jyldary Qylmystyq kodekske birqatar ózgeris engizildi. Osy ózgeristerge sáıkes birneshe ret urlyq jasaý jáne úı-jaılarǵa zańsyz kirý arqyly tonaý aýyr qylmys túrine jatqyzylyp, kinálilerdi jeke múlkin tárkilep, 7 jylǵa deıin bas bostandyǵynan aıyrý jazasy qarastyrylǵan bolatyn», dedi.
Krımınaldyq polısııa departamentiniń basshy qyzmetkeri brıfıng barysynda páter tonaýǵa qarsy is-qımyl jónindegi vedomstvolyq baǵdarlamalardyń eldegi krımınogendik jaǵdaıǵa oń yqpal etkenin de atap ótti. Osy baǵdarlama sheńberinde turǵyn úılerdiń aýlalarynda 54 myńnan astam beınebaqylaý kamerasy ornatylsa, 14 myńnan astam kamera turǵyndardyń bastamasymen jabdyqtalǵan. Spıker turǵyn úılerge baqylaý kameralaryn ornatyp, ortalyqtandyrylǵan júıege qosý jumysynyń áli de jalǵasyp jatqanyn málimdedi.
Al jaqynda el kóleminde ótken úshkúndik «Páter» jedel aldyn alý operasııasy kezinde 300-ge jýyq páter urysy anyqtalyp, qylmystyq jaýapkershilikke tartylǵan. Onyń ishinde 22 qylmystyq top ta bar. Sondaı-aq páter tonaǵandary úshin burynnan izdeýde júrgen 8 qylmysker qolǵa túsip, 67 kúdikti ustalǵan. Krımınaldyq jáne ákimshilik polısııa qyzmetkerleri jumyldyrylǵan aýqymdy is-shara barysynda urlanǵan múlikti satyp alatyn, ótkizetin bir jarym myńnan astam saýda orny jiti tekserilip, 240-qa jýyq páter urlyǵy ashylǵan.
Qoǵamda ózektiligin joımaı kele jatqan páter tonaý qylmysy elde jasalatyn barlyq urlyqtyń 10 paıyzyn quraıdy. Osyǵan oraı, vedomstvo ókili sóziniń sońynda úıden shyqqanda esik-tereze, balkondardy muqııat jaýyp ketý, kireberis esikke kúrdeli mehanızmderi bar, keminde 2 tıek qurylǵysyn ornatý sekildi urylardan saqtanýdyń qarapaıym erejelerin eske salyp ótti. «Zamanaýı elektrondy qorǵanys quraldary – qozǵalys datchıkteri, dybystyq sıgnalızasııany paıdalaný, úıde baǵaly zattar men aqsha, zergerlik buıymdardy arnaıy seıfterde saqtaý da – qylmyskerlerden qorǵanýdyń eń tıimdi ádisteriniń biri», dedi ol.