Atyraý oblystyq balalar aýrýhanasynda jol apatynan zardap shekken balanyń bas súıek plastıkasyna Bone Plate Titanium qoldanýmen kúrdeli ota jasaldy, dep habarlaıdy Egemen.kz.
«Áleýmettik medısınalyq saqtandyrý qory» KeAQ Atyraý oblysy boıynsha fılıalynyń dırektory Sábıt Quralbektiń aıtýynsha, 15 jasar Ádil Qarabalaev jol apatynan bas súıek-mı jaraqatyn alǵan. Jol apatynyń zardabynan basy men bet súıeginde kemistik paıda bolǵan.
«Sol sebepten, oǵan shuǵyl túrde sol jaq parıetaldy súıektiń kranıotomııalyq dekompressııasy jasaldy. Atalǵan ota bas súıektiń kosmetıkalyq kemshiligin joıýǵa múmkindik berdi. MÁMS júıesi aıasynda shuǵyl jasalǵan hırýrgııalyq otanyń quny 2,2 mln teńgeni quraıdy. Elimizde 18 jasqa tolmaǵan balalar MÁMS júıesinde memleket tarapynan saqtandyrylatyn jeńildigi bar sanattarǵa jatady. Osyǵan baılanysty Ádilge qymbat ota tegin jasaldy. Endi Ádildiń bas súıeginde kemistik bolmaıdy» deıdi Sábıt Quralbek.
Onyń málimetinshe, jyl basynan beri Atyraý oblystyq balalar aýrýhanasynda MÁMS júıesimen 971 ota jasalǵan. Onyń ishinde josparly túrde 191, shuǵyl túrde 780 ota bar.